ТР Мәгариф һәм фән министры студентларны Татьяна көне белән котлавы

Хөрмәтле студентлар, интерннар, аспирантлар сезне чын күңелдән Россия студентчылыгы бәйрәме – Татьяна көне белән котлыйм!
Кайчан да булса студент булган һәркем, уку еллары – тормышта иң яхшы, кызыклы һәм мөһим вакыйгаларга бай булып күңелгә кереп калган, дуслык һәм мәхәббәт белән истә калган күңелле чор дип бер шиксез әйтә алыр иде. Шул ук вакытта бу һәр яшь кеше өчен җитди һәм җаваплы чор, чөнки характер чыныга, киләчәк уңышларның нигезләре салына. Бу мөстәкыйль һәм куркусыз карарлар кабул итү чоры да, бу вакытта үз алдыңа амбициоз максатлар куеп, кыю планнар төзү дә куркыныч түгел. Барлык чорларда да нәкъ менә студентлар, яңалыкка һәм прогресска кызыксыну булуы, иҗади энергия һәм саекмас энтузиазмы белән аерылып торган. Без елдан-ел укуга, фәнни эшчәнлеккә, алдагы эш перспективаларына, республика һәм ил уңышларына кызыксынуыгызның тирәнәюен күрәбез. Бу сыйфатлар сезнең профессорларыгызга, остазларыгызга бик кадерле, алар сезгә барлык белемнәрен һәм тәҗрибәсен бирә. Мөгаллимнәрегезне хөрмәтләп, һөнәри үсешнең уникаль мөмкинлекләреннән максималь төстә файдаланырга тырышыгыз.
Быел Казан Бөтендөнья студент уеннарын кабул итә. Сезнең алда элек бары тик хыял гына була алган искиткеч мөмкинлекләр ачыла... Универсиадага әзерлек чоры эчендә Казан Россиянең әйдәп баручы спорт үзәкләренең берсенә әверелде. Сезнең күбегез студент отрядлары составында спорт объектлары төзелешендә эшләде, волонтерлык хәрәкәтендә актив катнаша. Бөтендөнья студент уеннарында катнашуыгыз, истәлекле вакыйга булып кына калмыйча, бай тормыш һәм һөнәри тәҗрибә булып та хезмәт итәренә ышанам. Яшьлек дәрте йөрәкләрегезне җылытып, Татьяна көне, ничә яшьтә булуыгызга карамастан, якты бәйрәмегез булсын!
Сезгә укуыгызда уңышлар һәм казанышларыгыз чикләрен киңәйтүче яңа мөмкинлекләр ачылуын теләп калам!