“Кече БДИ”ны үткәрү тәртибе һәм кагыйдәләре тәгаенләнде

Урта мәктәпнең 9 нчы сыйныфын тәмамлап чыкканда дәүләт (йомгаклау) аттестациясен үткәрүнең тәртибе һәм кагыйдәләре тәгаенләнде.
ТР Мәгариф һәм фән министрлыгы сайтында урнаштырылган мәгълүматка караганда, 2012-2013 уку елын тәмамлаганда тугызынчылар 5 имтихан тапшыра. Барлык кешегә дә бирү мәҗбүри булган рус теле һәм математикадан укучылар сынауны яңа формада - тестлар ярдәмендә язма рәвештә генә бирә алачак.
Тагын ике имтихан 9 нчы сыйныфта өйрәнелгән ике предмет буенча сайлап алына.
Әгәр сайлап алына торган предметлар яңа формада тапшырыла торган исемлеккә (җәмгыять белеме, тарих, физика, биология, химия, рус әдәбияты, география, чит телләр (инглиз, француз, немец, испан), информатика һәм информацион-коммуникатив технологияләр) кертелгән икән, укучылар бу предметтан сынауны яңа формада гына бирә ала.
Сайлап алынган предметлар яңа формада тапшырыла торган исемлеккә кермәгән икән, алар буенча белемеңне традицион формада да күрсәтә аласың. Бу предметларга физик культура, технология, тормыш иминлеге нигезләре, сәнгать, татар әдәбияты керә.
Татарстанда тугызынчыны тәмамлаганда татар теленнән имтихан тапшыру мәҗбүри куелган. Аны туган тел яки дәүләт теле буларак өйрәнгән барлык укучылар да бирә. Узган уку елында ТР Мәгариф һәм фән министрлыгы үз вәкаләтләре кысаларында яңа формада тестлар ярдәмендә татар теленнән имтихан тапшыруны да кертте. Шул ук вакытта традицион форма да сакланып калды. ТР Мәгариф һәм фән министрлыгының белем бирү сыйфатын тикшерү һәм укучыларны аттестацияләү бүлегеннән хәбәр иткәнчә, 2012-2013 уку елында да ике форма да гамәлдә булачак, укучылар кайсы формада бирәсен үзләре сайлап алырга тиеш.
2012-2013 уку елында Рособрнадзор 9 нчы сыйныфта дәүләт (йомгаклау) аттестациясе үткәрү вакытын 28 май – 14 июнь көннәренә билгеләде.