ТР мәгариф һәм фән министрының яңа урынбасарлары билгеләнгән

ТР Министрлар Кабинеты карары белән ТР мәгариф һәм фән министрының яңа урынбасарлары билгеләнгән. Алар – ТР Мәгариф һәм фән министрлыгының мәгариф өлкәсендә күзәтчелек һәм контроль департаменты идарәсен җитәкләгән Равил Хәмитов һәм Казан шәһәренең Мәгариф идарәсе башлыгы урынбасары булып эшләгән Светлана Гыйниатуллина.
Равил Хәмитов 1961 нче елда Чистайда туган. КДУ, соңыннан фәнни-педагогик математика һәм идарәнең автоматлаштырылган системаларын математик тәэмин итү белгечлеге буенча А.Ф.Можайский исемендәге Ленинград хәрби-инженерия институтын тәмамлаган.
Хезмәт эшчәнлеген 1991 нче елда математика һәм физика укытучысы буларак башлаган. Соңыннан ТР Мәгариф хезмәткәрләренең квалификациясен үстерү һәм яңадан әзерләү институтында, ТР Мәгариф үсеше институтында укыту-методик эш һәм мәгълүматлаштыру буенча проректор булып эшләгән. 2009 нчы елдан - ТР Мәгариф һәм фән министрлыгының мәгариф өлкәсендә күзәтчелек һәм контроль департаменты идарәсе башлыгы. Ул - педагогия фәннәре кандидаты, ТРның атказанган укытучысы.
Светлана Гыйниатуллина 1972 нче елда Казанда туган. В.И.Ульянов-Ленин исемендәге КДУ тәмамлаган. Хезмәт эшчәнлеген 1994 нче елда Казан шәһәре Авиатөзелеш районындагы 112 нче мәктәптә рус теле һәм әдәбияты укытучысы буларак башлаган. Соңыннан Казан шәһәре Авиатөзелеш районында мәгариф бүлегендә эшләгән. 2010 нчы елдан - Казан шәһәренең Мәгариф идарәсе башлыгы урынбасары.