Энгель Фәттахов ТР Дәүләт Советында хөкүмәт сәгатендә чыгыш ясады

Татарстан Дәүләт Советында “Татарстан Республикасында ата-ана тәрбиясеннән мәхрүм калган балаларны урнаштыру һәм аларга дәүләт ярдәме күрсәтү мәсьәләсе буенча законны гамәлгә кую” темасына багышланган хөкүмәт сәгате узды.
Бу уңайдан депутатлар алдында ТР мәгариф һәм фән министры Энгель Фәттахов хисап тотты. Хәзерге вакытта Татарстанда опека һәм попечительлек органнары контролендә 12121 кеше тора, дип белдерде ул. ТР Мәгариф һәм фән министрлыгы мәгълүматларына караганда, балаларның 11 меңнән артыгы үз кочагына алган гаиләләрдә тәрбияләнә, бу 90,8 процент тәшкил итә.
Министр билгеләп үткәнчә, соңгы 5 елда республикада уңай тенденцияләр күзәтелә: ел дәвамында ачыклана торган ятим балалар саны 40 процентка кимегән; ятим балалар тәрбияләүче дәүләт учреждениеләре саны 36 процент тирәсе кыскарган һәм бу учреждениеләрдә тәрбияләнүчеләр саны 58 процентка кимегән.
Э.Фәттахов фикеренә караганда, ятим балаларны гаиләгә уңышлы урнаштыру әлеге гаилә өчен өстәмә ярдәм чаралары тәкъдим итүдән тора. “Шул ук вакытта республикада гаиләсе – балалар йорты булган сабыйлар бар”, - дип ассызыклады министр. Ул 12 балалар йортында, 2 мәктәп-интернатта 600 бала тәрбияләнә дип белдерде.
Шулай ук докладчы гаиләләр, нигездә, укучы балаларны уллыкка яки кызлыкка ала, дип белгеләп үтте. Бу учреждениеләрдә һәр дүртенче бала психологик авыруга ия, 67 проценты 12 яшьтән өлкәнрәк балалар, 15 проценты тәрбиягә алынган гаиләләрдән кире китерелгән.
Быел ата-ана тәрбиясеннән мәхрүм калган балалар һәм ятим балалар өчен ике учреждениене үзгәртеп кору планлаштырыла. Алар - Бөгелмә балалар йорты һәм Казан Киров районы балалар йорты. 2014 елда тагын бер учреждение белән шул ук хәл көтелә.
Министр фикеренә караганда, ятим балаларны торак белән тәэмин итү мәсьәләсе проблемалы кала. Икенче проблема – социаль ятимнәр. Республика Мәгариф һәм фән министрлыгы мәгълүматларына караганда, балалар йортында тәрбияләнүче 600 баланың 105 генә тома ятим, 82 проценты ата-аналары булган социаль ятимнәр. “Тармак структураларының бары тик җайга салынган эше генә ятим балалар һәм социаль ятимнәр проблемаларын хәл итәргә ярдәм итәчәк”, - дип саный Энгель Фәттахов.