«Тоталь диктант»ны 2,5 меңнән артык казанлы язды

2020 елның 22 октябре, пәнҗешәмбе

Казан «Тоталь диктант»та катнашучылар саны буенча икенче урынны алды. Грамоталылыкны тикшерү буенча акциядә 2534 кеше катнашты. Татарстан башкаласын Санкт-Петербург кына узып китте, анда диктантны 2600 катнашучы язган.

Татарстанда «Тоталь диктант»ны 11 мең 534 кеше язган. Коронавирус пандемиясе аркасында акция онлайн-режимда узды, шуның аркасында диктант язу өчен мәйданчыклар саны артты: узган ел республикада акция 91 мәйданчыкта үткәрелсә, быел - 418 мәйданчыкта, дип хәбәр итә ТР Мәгариф һәм фән министрлыгының матбугат хезмәте.

Исегезгә төшерәбез, «Тоталь диктант» Россиядә һәм тагын 62 илдә узды. Анда чит илдән 70-тән артык шәһәр һәм Россиядән 546 шәһәр катнашты.