Лениногорск политехник колледжы филиалын тәмамлаучылар югары уку йортына 3 нче курска кабул ителә алачак

Азнакай шәһәрендәге 89 нчы һөнәри лицей 2012-2013 уку елы барышында Лениногорск политехник колледжы филиалы итеп үзгәртелде. Филиал директоры Роберт Хөснетдинов сөйләгәннәрдән аңлашылганча, колледж статусы чикләүләрсез 9нчы сыйныфтан соң укучылар кабул итәргә мөмкинлек биргән.
- Бүген хезмәт базарында сорауга ия һөнәрләр бирү өстендә эшлибез.
Колледжның уку планнары һәм программасы башлангыч һөнәри белем учреждениесенә караганда шактый катлаулырак. Биредә югары математика нигезләре, техник сызым, социология, философия кебек фәннәр укытылачак. Һөнәри белем алырга теләүчеләр конкурс нигезендә ГИА нәтиҗәләре яки өстәмә имтиханар буенча кабул ителәчәк, - ди ул.
Яңа һөнәрләргә килгәндә, егетләргә “Авыл хуҗалыгын механизацияләү” программасы буенча 3 ел да 10 ай эчендә техник-механик белгечлеге бирәләр. Аның өстенә тракторчы, машина йөртүче һ.б таныклыклар биреләчәк. Кызлар җәмәгатьчелек туклануы юнәлешендә техник-технолог һөнәрен үзләштерә. Алар кафе-рестораннарда технолог, производство мөдире булып эшли алачак.
Колледжда укуның тагын бер өстенлеге – аны тәмамлаучылар үз белгечлекләре буенча югары уку йортының 3 нче курсына укырга керә ала.
Киләсе уку елыннан читтән торып урта һөнәри белем алу мөмкинлеге туачак.
Колледжда өстәмә профессияләр алу мөмкинлеге дә бар. Кем дә кем өстәмә профессия алырга тели икән, түләү шартлары белән, кичке якта укып: машина йөртүче, пешекче, эретеп ябыштыручы, парикмахер, сатучы, тракторист таныклыклары алу мөмкинлеге дә каралган.