Биектауда “Белем бирү учреждениеләрендә янгынга каршы режим булдыру” дигән темага киңәшмә узды

Биектау муниципаль районының Чыпчык урта мәктәбендә “Белем бирү учреждениеләрендә янгынга каршы режим булдыру” дигән темага мәктәп директорлары киңәшмәсе узды.
Биредә башта янгынга каршы темага өч сыйныфта ачык дәресләр узды. Тәнәфестән соң укулар дәвам итте. Дәресләр башланганнан соң янгын чыккан очракта мәктәптән эвакуацияләү буенча өйрәнүләр узды. Мәктәп хезмәткәрләре һәм укучылар эвакуацияне, тиешле кагыйдәләрне һәм нормаларны үтәп, ыгы-зыгысыз уздырдылар. Укучылар барысы да саклагыч битлекләрдән иде. Мәктәптәге барлык документларны алып чыктылар.
Өйрәнүдән соң дәресләр дәвам итте һәм семинарның төп өлеше башланды. Беренче булып Чыпчык урта мәктәбе директоры К. Гыйльфанов чыгыш ясады. Ул гомуми белем бирү учреждениеләрендә янгынга каршы чараларны тәэмин итүгә кагылышлы төп мәсьәләләргә тукталды. Директор шулай ук максатлы программаның ничек үтәлүен дә аңлатып узды.
Семинарга Россия Гадәттән тыш хәлләр министрлыгының Татарстан Республикасындагы Дәүләт учреждениесе күзәтү эшчәнлеге идарәсенең күзәтү эшчәнлеге бүлеге өлкән инспекторы Н. Мускеев та чакырылган иде. Үзенең чыгышын ул республикада һәм районда янгынга каршы оператив хәлнең нинди булуы белән таныштырудан башлады. Агымдагы елның 29 гыйнварында Яр Чаллы шәһәренең 22 нче номерлы мәктәбендә чыккан янгын турында сөйләде. Чыгышында ул Биектау муниципаль районының гомуми белем бирү учреждениеләрендә янгынга каршы катгый рәвештә үтәлергә тиешле төп чараларны билгеләп үтте.