Татарстан укучылары «Имин юллар» онлайн-олимпиадасында катнаша ала
Татарстанның 1-4 нче сыйныф укучылары юлларда куркынычсызлык кагыйдәләрен белү буенча бөтенроссия онлайн-олимпиадасында катнаша ала. Олимпиада «Куркынычсыз һәм сыйфатлы автомобиль юллары» илкүләм проекты буенча оештырыла.
«Имин юллар» олимпиадасы 30 ноябрьдән 11 декабрьгә кадәр Учи.ру белем бирү платформасында узачак. Биремнәр ярышлар башланган көнне шәхси кабинетта ачык булачак.
Биремнәрне олимпиаданы үткәрү чорында теләсә кайсы уңайлы көндә узарга мөмкин. Ярыш башлангыч сыйныф укучылары өчен аңлаешлы һәм кызыклы интерактив укыту һәм тест биремнәреннән гыйбарәт.
Онлайн-олимпиадага йомгак ясаганнан соң, катнашучылар дипломнар, сертификатлар һәм Рәхмәт хатлары алачак.
Онлайн-олимпиада башланган көнне - 30 ноябрьдә республиканың гомуми белем бирү оешмаларында башлангыч сыйныф укучылары өчен юлларда тәртип нигезләрен белү буенча ачык дәресләр узачак. Әлеге чарада республика мәктәпләреннән 209 меңнән артык башлангыч сыйныф укучылары катнашачак.