Биектауда “Кояшлы балачак” программасы тормышка ашырыла

Биектау муниципаль районында балигъ булмаганнарга карата җәбер-золым һәм рәхимсез мөнәсәбәт фактларын ачыклау һәм аларны булдырмый калу буенча 2012-2015 елларга “Өмет” үзәге белгечләре тарафыннан эшләнгән, озак вакытка исәпләнгән “Кояшлы балачак” программасы тормышка ашырыла.
Программаны үтәү барышында “Өмет” халыкка комплекслы социаль хезмәт күрсәтү үзәге юристы һәм психологы район мәктәпләре директорлары, сыйныф җитәкчеләре, укучылар һәм ата-аналар өчен җыелышларда чыгыш ясаган. Чыгышларда төп максат итеп балаларга нинди куркынычлар янавы турындагы хәбәрдарлыкны, аларга каршы юнәлтелгән гамәлләр өчен җаваплылыкны арттыру бурычы куела. Мондый чараларда ике йөздән артык кеше катнашкан.
Җыелышлар “Мин – әти-әни” порталыннан алынган “Мальчик вокруг” видеоролигын караудан башланган. Роликны караучылар җәбер-золымның төрләре һәм ул китергән зыян, аңа дучар булган төрле яшьтәге балаларның үз-үзен тотышындагы үзенчәлекләр, балалар һәм үсмерләрне яклауга кагылышлы норматив-хокукый мәсьәләләр, балаларга аңлатылырга тиешле файдалы киңәшләр турында белгән. Ата-аналарга балаларына карата рәхимсез булганда һәм көч кулланганда аларда нинди сыйфатлар тәрбияләүләрен аңлатканнар. Балага кечкенә чакта сеңдерелгән сыйфатлар аның холкында гомер буена саклана.
Әти-әниләр балалар тәрбияләү буенча үзләрен кызыксындырган сорауларга җавапларны тормышта авыр хәлдә калган балаларга ярдәм Фонды сайтында табарга мөмкин булуын белгән.