Нурлатта китапханә системасының үткән елдагы эшчәнлегенә нәтиҗә ясалды

Нурлат муниципаль районы һәм Нурлат шәһәренең социаль өлкә, мәдәният, мәгариф, тәрбия, спорт һәм яшьләр сәясәте мәсьәләләре буенча даими комиссиясе әгъзалары китапханә системасының үткән елдагы эшчәнлегенә нәтиҗә ясады. Уртак утырыш эшен район башлыгы урынбасары Флюра Ногманова алып барды, дип хәбәр итә “Дуслык” газетасы.
- Мәгълүмати тирәлекнең тулы канлы субъекты булу өчен китапханәләр челтәре компьютер техникасын тормышка кертә һәм куллана, үзенең мәгълүматлар базасын булдыра һәм алып бара. Бүгенге көндә барлык китапханә филиаллары да компьютерлар һәм күчерү-күбәйтү техникасы белән җиһазландырылган. Акрынлап Интернет челтәренә тоташтыру бара, - дип билгеләп үтте үз чыгышында “Җирлекара үзәк китапханә” МБУсы директоры Роза Липатова.
Ул шулай ук район китапханә системасының эшчәнлеге турында сөйләде, уңай яклар белән бергә проблемалы мәсьәләләрне дә күтәрде. Алар нигездә хезмәткә түләү, ремонт үткәрүгә яки транспортның булмавына кагылышлы иде.
Нурлат муниципаль районы Советының социаль өлкә, мәдәният, мәгариф, тәрбия, спорт һәм яшьләр сәясәте буенча даими комиссиясе җитәкчесе Дамир Ишкинеев докладчыны тыңлап, районның китапханә хезмәткәрләренә четрекле һәм кирәкле хезмәтләре өчен рәхмәтен белдерде, утырышта кузгатылган кайбер мәсьәләләрне хәл итүдә ярдәмен тәкъдим итте. Эшлекле сөйләшүгә ноктаны район башлыгы урынбасары Флюра Ногманова ясады.