Россия вузларының конкурентлыкка сәләтлелеге белән махсус совет шөгыльләнәчәк

Россиядә әйдәп баручы вузларның конкурентлыкка сәләтлелеген үстерү белән махсус совет шөгыльләнәчәк. Бу хактагы карарны 18 мартта РФ Хөкүмәте Рәисе Дмитрий Медведев имзалаган. Советка кемнәр керәчәген РФ Мәгариф һәм фән министрлыгы хәл итәргә тиеш.
Шул ук карар белән Россиянең әйдәп баручы югары йортларына дәүләт тарафыннан 2013 елда 9 млрд. сум күләмендә ярдәм күрсәтеләчәге хәбәр ителә. Моның максаты – дөньякүләм әйдәп баручы фәнни-белем бирү үзәкләре арасында конкурентлыкка сәләтлелекне арттыру.
2012 елның декабрь аенда РФ Мәгариф һәм фән министрлыгының, Россия вузларына дөньядагы иң яхшы йөз югары уку йорты исәбенә керергә ярдәм итәргә юнәлтелгән проектларны тормышка ашыру өчен, 2015 елның ахырына кадәр 55 млрд. сум акча бүлеп бирергә уйлавы турында хәбәр ителгән иде. Бу 2013 елда – 9 млрд. сум, 2014 елда – 21 млрд. сум, 2015 елда – 24 млрд. сум дигән сүз.
Британиянең Times Higher Education журналы тарафыннан Thomson Reuters агентлыгы белән берлектә 2012 елның октябрендә төзелгән Times Higher Education World University Rankings рейтингы буенча Россия вузлары 200леккә дә кермәгән иде.
Гомумән алганда, 400 уку йортыннан торган рейтингка бары тик ике университет – Ломоносов исемендәге Мәскәү дәүләт университеты һәм “МИФИ” илкүләм атом-төш тикәеренү университеты гына керде.
2012 елның ноябрь аенда Economist Intelligence Unit аналитик компаниясе Россия белем бирү системасын үз рейтингында 20 нче урынга урнаштырды. Әлеге рейтинг грамоталылык, матетиканы белү һәм базис фәнни белемнәр критерийларын үз эченә халыкара тестларга нигезләнгән. Анда шулай ук мәктәпне тәмамлаучылар һәм югары уку йортларында укучыларга кагылышлы күрсәткечләр дә исәпкә алынган.