Бердәм дәүләт имтиханын вакытыннан алда тапшыру вакыты якынлаша

2013 елда Бердәм дәүләт имтиханын вакытыннан алда тапшыру вакыты якынлаша. РФ Мәгариф һәм фән министрлыгының Мәгариф һәм фән өлкәсендә күзәтчелек итү буенча федераль хезмәт (Рособрнадзор) раслаган бердәм расписание буенча, ул бу уку елында 20 апрель – 6 май көннәренә туры килә.
2013 елда Бердәм дәүләт имтиханын тапшырырга теләп, 850 меңнән артык кеше гариза биргән, шуның 763е – элекке елларда мәктәп тәмамлаучылар. БДИның төп этабы 27 май-19 июнь көннәренә туры килә.
Бу елда БДИны вакытыннан алда шушы көннәрдә биреп булачак: рус теле буенча имтиханны тапшыру – 20 апрельгә, математика – 23 апрельгә, чит телләр, география, химия һәм тарих – 26 апрельгә, информатика һәм информацион-коммуникатив технологияләр (ИКТ), биология, җәмгыять белеме, рус әдәбияты һәм физика 29 апрельгә куелган. Бу көннәрдә ниндидер җитди сәбәп белән имтихан бирмәүчеләр яки имтихан эшләрен тәмамлый алмаучылар өчен өстәмә көн итеп 6 май куелган.
БДИны вакытыннан алда тапшыру хокукына Россия армиясенә чакырылган, кичке мәктәпләрне тәмамлаучылар; Россиякүләм яки халыкара спорт ярышларына, бәйгеләргә, олимпиадаларга һәм күнегүләр үткәрү белән бәйле сборларга китүчеләр; чит илгә яшәргә яки укуын дәвам итәргә китүчеләр; сәламәтлеге какшау сәбәпле, дәвалау-профилактика яки башка учреждениеләргә сәламәтләндерү һәм тернәкләндерү чаралары узу өчен җибәрелүчеләр; Россия Федерациясенең башка илләрдә урнашкан белем бирү учреждениеләрен тәмамлаучылар ия.
Рус теленнән – 36 балл, математикадан – 24 балл, физика, химия һәм биологиядән – 36 балл, информатика һәм информацион-коммуникатив технологияләрдән (ИКТ) – 40 балл, тарихтан – 32 балл; географиядән – 37 балл; җәмгыять белеменнән – 39 балл; рус әдәбиятыннан – 32 балл; чит телләрдән 20 балл җыелса, теге яки бу предметтан имтихан тапшырылган дип санала.
Имтиханны вакытыннан алда тапшыручылар сынау нәтиҗәләрен имтиханны төп этапта тапшыручыларның нәтиҗәләрен көтмичә дә белә алачак. Бу хакта Тестлаштыру буенча федераль үзәк директоры Сергей Тимофеев хәбәр итте.