ТР мәгариф һәм фән министры Ингушетия Республикасы Мәгариф һәм фән министрлыгы башлыгы белән очрашты

Бүген ТР мәгариф һәм фән министры Энгель Фәттахов Казанга ике көнлек эшлекле сәфәр белән килгән Ингушетия Республикасы Президенты Юныс-Бәк Евкуров җитәкчелегендәге делегация составында булган Ингушетия Республикасы Мәгариф һәм фән министрлыгы башлыгы Руслан Кодзоев белән очрашты.
Ингушетия Республикасы Мәгариф һәм фән министрлыгы башлыгын тармак модернизациясе контекстында ТР мәгарифе үсеше системасы белән таныштырдылар. Руслан Кодзоевны ареуча балаларны мәктәпкәчә белем бирү учреждениеләрендә урыннар белән тәэмин итү йөзеннән гамәлгә кертелгән “Бәләкәч” – “Малыш” ТР Президенты программасы кызыксындырды, дип хәбәр итә ТР Президенты матбугат хезмәте.
“Бездә мәгариф учреждениеләренең һәм укучыларның ун тапкыр кимрәк булуына карамастан, модернизация өлкәсендә безнең проблемалар күбрәк. Татарстан Республикасы күп кенә күрсәткечләр буенча, шул исәптән, мәгариф өлкәсендә дә лидер булып тора. Сездә 3-7 яшьлек балалар өчен балалар бакчаларында 8 мең өстәмә урын кирәк булса, бездә – 34 мең. Безнең мәктәпләрдә дә шундый ук хәл, аларның яртысыннан артыгы ике-өч смена эшли”, - дип билгеләде Руслан Кодзоев.
“Без Татарстанның электрон мәгариф программасы, ерактагы мәктәпләрдә дистанцион укыту технологияләре, мәгариф учреждениеләренә һәм укытучыларга грант бирү программалары белән якыннанрак танышырга телибез”, - дип ассызыклады ул.
ТР Мәгариф һәм фән министрлыгы башлыгы Энгель Фәттахов Ингушетия Республикасы мәгариф һәм фән министрына Татарстанда сәләтле балаларны ачыклау һәм аларга ярдәм итү буенча эшнең ничек алып барылуын сөйләде. Руслан Кодзоевны профильле мәктәпләрне вузларга һәм предприятиеләргә “беркетү” идеясе кызыксындырды.
Очрашу соңында Татарстан һәм Ингушетия Мәгариф һәм фән министрлыклары җитәкчеләре мәгариф өлкәсендә ведомстволар арасында хезмәттәшлек турында килешүгә кул куйдылар.