Азнакайда 1 заманча компьютерга 6 укучы туры килә

Азнакай муниципаль районында 1 заманча компьютерга 6 укучы туры килә (республика буенча – 8). 2011 елда 9 бала булган.
Быелгы уку елында барлык башлангыч сыйныфларда федераль дәүләт белем бирү стандарты кертелгән. 4 нче сыйныфларны бердәм дәүләт имтиханы технологиясе буенча тестлаштыру нәтиҗәләре укучыларның рус теле һәм математикадан яхшы хәзерлеген күрсәткән.
Районда сәләтле балаларны ачыклау һәм үстерү буенча максатчан эш алып барыла. Узган ел Бөтенроссия күләмендәге конкурсаларда катнашучыларның саны һәм нәтиҗәлелеге арткан, әмма республика бәйгеләрендә нәтиҗәлелек кимегән.
Мультимедиа техникасы паркын яңарту һәм мәгариф учреждениеләрен укыту-лаборатор җиһазлар белән баету да уңай нәтиҗәләрен биргән.
Алга таба белем һәм тәрбия бирүнең сыйфатын арттыру, гомумбелем бирү учреждениеләренең инфраструктурасын яңарту, мәктәпкәчә учреждениеләрдә дәүләт-шәхси партнерлыкны үстерү, профориентация эшчәнлеген көчәйтү, өлкән сыйныфларда профильле, аеруча техник профильдәге укытуга игътибарны арттыру бурычлары тора.