“Күптеллелек шартларында тел компетентлылыгының актуаль мәсьәләләре” темасына укучыларның төбәкара фәнни- гамәли конференциясе

Татарстан Республикасы мәгариф һәм фән министрлыгының еллык планы нигезендә 2013 нче елның 29 нчы мартында Яр Чаллы шәһәренең 76 нчы гимназиясендә “Күптеллелек шартларында тел компетентлылыгының актуаль мәсьәләләре” темасына укучыларның төбәкара фәнни- гамәли конференциясе үтте. Конференция укучылырның иҗадилыгын үстерүгә, талантлы, сәләтле балаларны ачыклау һәм аларны тел белеме өлкәсендә фәнни- тикшеренү эшчәнлегенә тартуга юнәлдерелгән иде. Чараның төп максаты булып укучылар арасында мөстәкыйль интеллектуаль- иҗади эшчәнлекне популярлаштыру, күптеллелек шартларында телләрне үстерү һәм саклау проблемаларына киң җәмьгатьчелекнең игътибарын арттыру торды.
Конференциядә Татарстан Республикасы мәгариф һәм фән министрлыгы , Мәгарифне үстерү институты вәкилләре, Казан Идел буе федераль университететының Яр Чаллы филиалы, Яр Чаллы социаль- педагогик ресурслар институты галимнәре,шәһәрнең милли мәгариф эшләре өчен җаваплы мәгариф бүлеге, мәгълүмати-методик үзәк белгечләре, Татарстан Республикасы Язучылар берлеге әгъзалары, татар теле һәм әдәбияты укытучылыры, 9-11 нче сыйныф укучылары-барлыгы 135 кеше катнашты.
Конференция пленар утырыш эшчәнлеге белән ачылды. Үз чыгышларында Мәгариф һәм фән министрлыгы , Мәгарифне үстерү институты вәкилләре заман мәктәбенең югары әхлаклы,рухи яктан бай шәхес тәрбияләүгә, фәнни эшчәнлекне үстерүгә,милли мәдәниятләрне өйрәнү һәм ныгытуга, күптеллелек шартларында туган һәм чит телләрне бер дәрәҗәдә өйрәнүгә юнәлдерелгән эшчәнлек алып барырга тиешлелеген ассызыкладылар. Гимназия директоры М. Р. Сабирова укучыларда тәрбиялелек һәм әхлакый сыйфатлар формалаштыруда нәкъ тел белеме фәннәрен укыту сыйфатының роле зур булуга басым ясады. Бу фикерләр чыгыш ясаучы эксперт комиссиясе әгъзалары, шагыйрь, “Көмеш кыңгырау” балалар гәҗите баш мөхәррире,филология фәннәре кандидаты Факил Сафин, шәһәр Мәгариф идарәсе вәкилләре чыгышларында да дәвам иттерелде.
Читтән торып катнашу турына Татарстан Республикасының төрле районнарыннан 130 эш җибәрелгән иде.Эксперт комиссиясе фәнни эш таләпләренә җавап бирүче 57 хезмәтне сайлап алды. Алар фәнни- тикшеренүне телдән яклау өчен II турга чакырылдылар.Бу этапта бәя бирүнең төп критерийлары булып идеянең яңалыгы һәм актуальлеге, проектның гамәли әһәмияте,теманың тирәнтен ачылуы, материалны бирү формасы һәм аны белү дәрәҗәсе торды.
Конференция эшчәнлеге дүрт секциядә алып барылды:
- Татар филологиясе.(Җитәкче- Мозаффарова Мингаян Гаяз кызы, педагогия фәннәре кандидаты, Мәгарифне үстерү институтының белем бирүдә менеджмент кафедрасы доценты);
- Рус филологиясе.( Җитәкче- Федотова Наталья Фәһим кызы,филология фәннәре кандидаты,Казан (Идел буе) федераль университетының Яр Чаллы филиалы “Журналистика һәм филология”кафедрасы деканы);
- Инглиз филологиясе. ( Җитәкче-Газизова Әлфия Илдус кызы,педагогия фәннәре докторы, профессор, Казан (Идел буе) федераль университетының Яр Чаллы филиалы чит телләр кафедрасы җитәкчесе);
- Чагыштырма грамматика. ( Җитәкче-Билялова Альбина Әнвәр кызы, филология фәннәре докторы, Казан (Идел буе) федераль университетының Яр Чаллы филиалы чит телләр кафедрасы профессоры);
Фәнни-гамәли конференциядә җиңүчеләр һәм бүләкләнүчеләр булып Яр Чаллы шәһәре, Мөслим ,Кукмара ,Балтач, Лениногорск,Чистай,Әгерҗе муниципаль районнарыннан килгән укучылар танылды.
Конференция эшчәнлеге карар кабул итү белән тәмамланды. Конференцияне киләсе уку елында да оештырырга тәкъдим ителде.