Күпмилләтле якшәмбе мәктәбе бүлекләрен ТРның берничә районында ачачаклар
Мәгариф һәм фән министрлыгы Татарстан халыклары Ассамблеясе белән берлектә быел якшәмбе мәктәпләре челтәрен киңәйтергә планлаштыра. Бу хакта «Адымнар» полилингваль комплексында узган «Мәрхәмәт-Милосердие» хатын-кыз депутатлар берләшмәсенең түгәрәк өстәлендә ТР мәгариф һәм фән министры урынбасары Минзәлия Закирова хәбәр итте.
«Якшәмбе мәктәбенең 42 бүлекчәсендә 25 милләт теле һәм мәдәнияте өйрәнелә, — дип сөйләде докладчы. — Күпмилләтле якшәмбе мәктәбенең бүлекчәләрен кайсы муниципалитетларда ачу мөмкинлеге барлыгы турында алдан фикер алыштык».
М.Закирова шулай ук республиканың белем бирү оешмаларында биш телдә — рус, татар, чуаш, удмурт һәм мари телләрендә укыту алып барыла, дип билгеләп үтте. Моннан тыш, җиде тел – рус, татар, чуаш, удмурт, мари, мордва һәм иврит өйрәнү предметы булып тора.
"Сүз дә юк, республикада рус телен дәүләт теле буларак үстерүгә зур әһәмият бирелә», — дип ассызыклады ул.
Министр урынбасары Казанда һәм Чаллыда, Баулы, Минзәлә һәм Түбән Кама районнарында рус телен һәм мәдәниятен тирәнтен өйрәнүле 20 мәктәп эшләвен билгеләп үтте. Аларда 9 меңнән артык укучы белем ала.