«Укыту һәм тәрбия процессында керәшен этнокультурасы компоненты» темасына семинар узды

16 апрель көнне Казан шәһәренең Халыклар дуслыгы йортында “Укыту һәм тәрбия процессында керәшен этнокультурасы компоненты” дигән темага семинар үтте. Әлеге семинарны Татарстан Республикасы фән һәм мәгариф министрлыгы, Татарстан Республикасы Фәннәр академиясенең Ш.Мәрҗәни исемендәге Тарих институты каршындагы керәшеннәр һәм нагайбакларның тарихын, мәдәниятен өйрәнү Үзәге, Татарстан Республикасы керәшен иҗтимагый оешмасы бергәләп оештырды. Семинарда галимнәр, Мәгариф һәм фән министрлыгы вәкилләре, республиканың 20 районыннан укытучылар, тәрбиячеләр, балалар бакчалары хезмәткәрләре, музей хезмәткәрләре катнашты.
Татарстан Республикасы Керәшен иҗтимагый оешмасы башкарма комитеты җитәкчесе, “Туганайлар” газетасы баш редакторы Людмила Белоусова, семинарны ачканда, аның ни өчен оештырылуы, монда нинди бурычлар куелуы, нинди нәтиҗәләргә ирешү күз алдында тотылуы турында сөйләде.
Буыннан буынга килгән һәм тәрбия процессында кулланылган ысуллар, нәтиҗәле алымнар, гомуми кабул ителгән һәм гадәткә кергән таләпләр, гореф – гадәтләр, гыйлем – күнекмәләр, педагогик карашлар һәм аларның яшь буынга белем – тәрбия бирүдәге роле турында сүз алып барылды семинарда . Һәр баланың табигый сәләтләрен мөмкин кадәр күбрәк үстерү һәм тормышта туган теләсә нинди мәсьәләләргә тәнкыйди якын килеп, аларны мөстәкыйль рәвештә чишә алучы яшь буын тәрбияләүдә халык педагогикасының әһәмиятен үзенең чыгышында Ш. Мәрҗәни исемендәге тарих институты каршындагы керәшеннәр һәм нагайбакларны өйрәнү Үзәге җитәкчесе Геннадий Макаров яктыртты. Татарстан Республикасы фән һәм мәгариф министрлыгының милли мәгариф һәм төбәкара хезмәттәшлек бүлеге хезмәткәре Илгизә Гомәрова да семинар темасының бүгенге көндә кирәкле булуын ассызыклап, милли горурлык хисе кичерүче, бүгенге вәзгыятьтә туган теленә карата игътибарлы, бар күңеленнән рәхәтләнеп аралашырга омтылучы шәхес тәрбияләүнең актуаль проблема булып торуын билгеләп үтте.
Семинарда «Айбагыр» этник лагереның педагог-оештыручысы Светлана Максимова, Казан культура һәм сәнгать университеты профессоры Татьяна Дунаева, Г.Ибраһимов исемендәге тел, әдәбият, сәнгать институтының фәнни хезмәткәре Ольга Бятикова, Чаллы шәһәре керәшен атнакөн мәктәбе директоры Нина Кудряшова, Казан федераль университеты доценты Николай Максимовлар чыгыш ясады. Фикер алышуларда Мамадыш районы керәшен җәмгыяте җитәкчесе Степан Спиридонов, Алабуга районы Шүрнәк гомумбелем бирү мәктәбе директоры Валерий Абакаев, Әлмәт шәһәре 36 нчы балалар бакчасы җитәкчесе Татьяна Гудакова һ.б. катнашты.
Казан шәһәре Яңа Савин районының 13 нче гимназиясендә эшләп килүче күп милләтле якшәмбе мәктәбенең керәшен фольклор классыннан “Балтырган” төркеме чыгышы (җитәкчесе Татьяна Галкина) чарада катнашучыларны таң калдырды. Семинар керәшеннәрнең “Бәрмәнчек” дәүләт фольклор ансамбле чыгышы белән тәмамланды.
Семинарда катнашучылар укыту һәм тәрбия процессында керәшен этнокультурасы компонентын куллану мәсьәләсен бүген үк хәл итәргә кирәклеген ассызыкладылар. Бу эшне системалы алып бару максатын күз алдында тотып, координацион Үзәк төзелде. Үзәккә әлеге өлкәдә эш алып барырга тиешле 9 кеше кертелде.