Казан укучылары финанс белеме буенча федераль олимпиадада катнашты
Казан укучылары "Яшь эшмәкәр һәм финанс белеме" бушлай онлайн-олимпиадасы кысаларында Учи.ру платформасында узучы финанс белеме буенча бөтенроссия онлайн-олимпиадасының төбәк этабына старт бирделәр. Ул балаларга шәхси финанслар белән идарә итүнең нигезләре белән танышырга мөмкинлек бирәчәк һәм киләчәктә кирәк булачак акча белән эшләүнең гамәли күнекмәләрен бирәчәк. Әлеге чара ТР Милли банкы һәм ТР мәгариф һәм фән министрлыгы катнашында Казанның 5 нче лицеенда узды. Татарстан Республикасы мәгариф һәм фән министры Илсур Һадиуллин онлайн-олимпиаданың «Кече һәм урта эшкуарлык һәм шәхси эшкуарлыкка ярдәм» илкүләм проекты кысаларында узуын искәртте. Аның максаты – балаларга финанслар белән сак һәм рациональ идарәнең төп принципларын җиткерү.
«Әлеге олимпиада 2015 елдан бирле уза һәм балаларга финанс белеменә төшендерү мөмкинлеге бирә. Хәзерге дөньяда мондый компетенцияләр – яшьләр өчен дә, өлкәнрәк буын өчен дә белем багажының аерылгысыз өлеше. Шуңа күрә без бу юнәлешне актив үстерәбез», — дип сөйләде журналистларга Һадиуллин. Ул ачыклык керткәнчә, олимпиада 1 сыйныфтан алып 9 сыйныфларга кадәр кагылачак, илдә ул 13 апрельдән башлап уза һәм 17 майда тәмамланачак. Татарстан белән бергә бүген әлеге чарага Россиянең тагын 12 төбәгендә старт бирелде. Татарстан укучыларының финанс белеме федераль дәрәҗәдә шактый югары булуы күренде: республика балалары Россия Үзәк банкы җитәкчесе Эльвира Нәбиуллинага сорауларын бирә алган төбәкләр бишлегенә эләкте.
Министр сүзләрен чараның башка зур кунагы – ТР Милли банкы идарәчесе Марат Шәрифуллин да тулыландырды. Ул яшьтән үк финанс белемен күтәрүнең мөһимлеген ассызыклады.
"Финанс белеме нигезләрен кечкенәдән үк салырга кирәк. Хәзер сез – мәктәп укучылары, әмма берничә елдан соң сезнең кайсыгыз эшмәкәр булачак, кемдер финанслар өлкәсендә эшләячәк. Сез үзегезне нинди һөнәрдә гамәлгә ашыруыгыз мөһим түгел, финанс белеме буенча белем сезгә һәркайда кирәк булачак, һәм олимпиадада биремнәрен сез, мөгаен, реаль тормышта да табасыз", — дип мөрәҗәгать итте җыелган укучыларга Марат Шәрифуллин һәм балаларга олимпиада биремнәрен чишүдә уңышлар теләде. Чараның рәсми өлеше тәмамлангач, кунаклар бергә олимпиада стартының символик төймәсенә бастылар.