Татарстан Президенты - БДИны ике йөз баллга тапшыручыларга: Сез - безнең яшьләр өчен чын үрнәк
Бүген Татарстан Президенты Рөстәм Миңнеханов Актанышка эш сәфәре кысаларында БДИ буенча 200 балл алган чыгарылыш сыйныф укучылары белән очрашты. Очрашу мәгариф һәм фән хезмәткәрләренең республика август киңәшмәсе кысаларында узды. Очрашуда Татарстан Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин һәм Россия мәгариф күзәтчелеге җитәкчесе Анзор Музаев катнашты.
Рөстәм Миңнеханов чыгарылыш сыйныф укучыларын БДИ нәтиҗәләре белән котлады. «Бу сезнең зур хезмәтегез һәм тырышлыгыгыз, остаз-педагогларның эше, туганнарыгыз һәм якыннарыгыз ярдәм итү нәтиҗәсе. Без сезнең белән бик горурланабыз. Сезне Олимпия чемпионнары белән чагыштырырга мөмкин. Сез - яшьләр өчен чын үрнәк», - диде ТР Президенты.
Ул билгеләп үткәнчә, БДИны ике йөз баллга бирүче укучыларның перспективалары зур, һәр Россия югары уку йорты мондый абитуриентларда кызыксына. "Алга таба барысы да сездән тора. Сез Татарстан югары уку йортын, йә Россиянең башка шәһәрендә университет сайлый аласыз. Без үз чиратыбызда сезнең белән элемтәләрне сакларга һәм киләчәктә элемтәне сакларга телибез. Киләчәктә Татарстанга кайтырга уйласагыз, без моңа шат кына булачакбыз», - диде Рөстәм Миңнеханов.