"Адымнар" өстәмә белем бирү үзәге яшь полиглотларны, экологларны һәм математикларны укытачак
Сентябрь башына планлаштырылган «Адымнар — белем һәм татулыкка юл» өстәмә белем бирү үзәгендә төрле профильле сменалар үткәреләчәк — барлыгы алты смена планлаштырыла. Бу хакта «Татар-информ» МА матбугат конференциясендә ТР тарих һәм мәдәният һәйкәлләрен торгызу Республика фонды башкарма директоры, ТР Дәүләт Советы Рәисе урынбасары Татьяна Ларионова хәбәр итте.
«Без яшь полиглотлар белән дәресләр үткәрәчәкбез, ул вакытта барлык өч тел дә — рус, инглиз һәм татар теле генә түгел, ә гарәп, француз, итальян телләре дә безнең укытуда катнашачак. Инде хәзер үк Казан комплексында балалар үзләре теләгән телләрне өйрәнә», — дип билгеләп үтте спикер.
Шулай ук балаларны сәламәтләндерүгә дә зур игътибар биреләчәк, чөнки баланың сәламәтлеге — аның үсешендә, укуында һәм укуда ирешкән уңышларында мөһим өлешне тәшкил итә, дип өстәде Ларионова. «Шуңа күрә „Батыр“ кебек профильле сменалар уздырачакбыз, анда сәламәтлек саклау технологияләренә һәм сәламәт яшәү рәвешенә күп игътибар бирәчәкбез», — дип белдерде рәис урынбасары.