Лениногорски муниципаль районында Җәмит Рәхимов укулары үтте

Лениногорски муниципаль районының Керкәле төп гомуми белем бирү мәктәбендә беренче тапкыр республикакүләм Җәмит Рәхимов укулары үтте. Фәнни-гамәли конференцияне оештыручылар: Татарстан Республикасы Язучылар Берлеге, Лениногорск муниципаль районы хакимияте, Лениногорск муниципаль районы мәгариф идарәсе, Керкәле төп гомуми белем бирү мәктәбе, галим һәм язучы Әнвәр Хәйри.
Конференцияне мәктәп директоры Гыйләҗев Әкрәм Гата улы кунакларны сәламләү белән ачып җибәрде, ни өчен нәкъ Керәле мәктәбенә җыелуыны әйтте һәм катнашучыларга уңышлар теләде.
Укуларны ачу тантанасында Лениногорск муниципаль районы башкарма комитеты урынбасары Гөлфирә Рафикова районның башкарма комитеты башлыгы Рәгать Хөсәеновның котлауларын җиткерде һәм төбәк мәгърифәтчесе Галия Рәхимовага бүләк тапшырды.
Мәгариф идарәсе башлыгы урынбасары Вәгыйз Санатуллин кунакларны котлап, укуларның уңышлы булуын теләде, кыскача гына Җәмит абыйның хезмәтләре белән таныштырып үтте.
Пленар утырышта сүз Казаннан килгән мәртәбәле кунакларга бирелде. Татарстан фәннәр академиясе академигы, тарих фәннәре докторы, Индус Таһиров бу укуларның башлануына бик шатлануын белдерде. Ул Җәмит абыйның эшчәнлеге хакында сөйләде, бу гаилә турындагы истәлекләре белән уртаклашты, Галия апаның әхлак тәрбиясе бирүдәге эшчәнлеген югары бәяләде.
Татарстанның атказанган мәдәният хезмәткәре, шагыйрь, эзтабар язучы, Ломоносов исемендәге Россия премиясе лауреаты, “Сүз” китап нәшриятының баш мөхәррире Шаһинур Мостафин бу якларда беренче тапкыр гына булуын, академиклар Индүс һәм Энгель Таһиров, Гали Даутов кебек шәхесләрне, Ш.Бикчурин, Җ.Рәхимов кебек язучыларны биргән төбәк халкын, табигатен күрүенә бик шат булуын әйтте, Җ.Рәхимов иҗатына тукталды.
Керкәле мәктәбе белән 2005 елдан бирле хезмәттәшлек итүче, бу укуларны үткәререгә тәкъдим итүче - Татарстанның атказанган фән эшлеклесе галим һәм язучы Әнвәр Хәйри. Ул мондый конференцияләр укучыларның фәнгә, туган якларына кызыксынуларын арттырыр, милләт горурлыгы булырдай шәхесләр тәрбияләр, чөнки сезнең төбәктә мәгърифәтче Галия апа бар, диде. Киләчәктә укуларның дәвамлы булуын һәм төбәктән чыккан күренекле шәхесләрнең, галим, язучыларның барысының да эшчәнлеген яктырткан фәнни-эзләнү эшләре күбрәк булсын иде дигән теләген җиткерде. Керкәле мәктәбенең иң сәләтле, иң тырыш укучысы, бәйгеләрдә җиңүче 9нчы сыйныф укучысы Рамазанова Алисәгә үзенең шәхси бүләген – заманча, бик кыйммәтле телефон тапшырды.
Пленар утырышта Әлмәт язучылар берлегеннән Әхәт Хәбибуллин, районның “Чишмә” иҗат берләшмәсеннән – Рәсим Хәбибуллин , Таһир Шәмсуаров һәм Әлмәт муниципаль хезмәт институты доценты Рауза Гарапова чыгыш ясады. Ул конференция материалларын җыентык итеп туплап чыгарырга тәкъдим итте.
Конференция эше секцияләрдә дәвам итте. Катнашучылар, килгән кунаклар саны 100 гә якын булды. Укулар җиңүчеләрне бүләкләү, дипломнар тапшыру һәм резолюция кабул итү белән төгәлләнде. Һәркем конференция эшеннән канәгать калды