ЯҢАЛЫКЛАР

Бүген “Казан ярминкәсе”ндә WorldSkills Russia-2014 II Милли эшче һөнәрләр чемпионатында катнашучылар турнирын карар өчен бик күп халык җыелды. Республикабыз районнары һәм шәһәрләреннән килгән югары сыйныф укучылары үзләренең мөгаллимнәре белән бергә яңа һөнәрләр белән таныша ала һәм 35 белгечлек буенча катнашучы конкурсантларның һөнәри осталыгын күрә ала.

Республикабыз халкы социаль әһәмияткә ия булган “Үз мәктәбеңә ярдәм ит!” акциясенә битараф калмады. Мәктәпне төрле елларда тәмамлаучыларның күбесе, эшләре тыгыз булуга карамастан, вакыт табып үз мәктәбенә ярдәм итә. I-нче кварталда гына да 250 иганәче үз мәктәбенә 5,1 млн сум күләмендә ярдәм күрсәткән.

1995 елдан башлап һәр елны мәктәп укучылары арасында мәгълүмати-коммуникацион технологияләр өлкәсендә сәләтлеләрне ачыклау һәм аларга ярдәм итү максатыннан “Яшь программист” Республикакүләм бәйгесе үткәрелеп килә.

Быел җәйге каникулда Казанның 27,6 меңләп (былтыр – 26 мең 782) мәктәп-гимназия укучысы 4 төрле лагерьда физик һәм интеллектуаль көч җыячак. Аерым алганда, 134 мәктәп яны лагеренда 13 мең бала ял итә, 133 хезмәт һәм ял лагеренда - 1,6 мең, палаткалардан торган 3 лагерьда – 500, шәһәрдән читтәге стационар 24 лагерьда (аларның 14е – муниципаль, 10сы – предприятиеләр һәм оешмалар лагерьлары) – 12,5 мең.

Алабуга районына Татарстан Мәгариф һәм фән министрлыгыннан 50 планшет кайтты. Аларны шәһәр һәм авылдагы мәктәпкәчә балалар учреждениеләренә бирделәр. Бу – “Татарстан Республикасында мәгариф үсеше стратегиясе” программасы тормышка ашуның бер этабы.

16 майда Казанда, Россия Федерациясе Хөкүмәте рәисе урынбасары Ольга Голодец һәм Татарстан Республикасы Премьер-министры Илдар Халиков катнашында, Бөтенроссия һөнәри осталык конкурсы - WorldSkills Russia-2014 II Милли чемпионатының ачылу тантанасы узды.

Әлеге чарада 500 үзешчән чыгыш ясады. Мәртәбәле кунаклар арасында Татарстан Республикасының мәгариф һәм фән министры Энгель Навапович Фаттахов һәм Светлана Владимировна Гиниатуллина да бар иде. Барлык катнашучылар катнашу таныклыгына ия булдылар, 57 җиңүче арасында 1 Гран-при, 29 лауреат, 27 дипломант дипломнар һәм акчалата сертификатлар белән бүләкләнделәр.

2014 елның 23-24 маенда Яр Чаллы шәһәрендә Л.Б.Васильев ис. Кама политехника көллияте базасында “Киң профильле станокчы” белгечлеге буенча Бөтенроссия һөнәри осталык олимпиадасының йомгаклау этабы узачак.

“Безнең яңа укытучы” грантын алу өчен дәгъва кылучылардан заявкалар 10 июньгә кадәр кабул ителәчәк. Әлеге Грант Татарстан Республикасы Фән һәм мәгариф министрлыгы тарафыннан абруйлы уку йортларында белем алган егет-кызларны, яшь аспирантлар һәм фән кандидатларын мәктәпкә җәлеп итү максатыннан гамәлгә ашырыла.

Татарстан Мәгълүматлаштыру һәм элемтә министрлыгы, Мәгариф һәм фән министрлыгы белән берлектә, республика муниципаль районнарының мәгариф бүлекләрендәге яңа хезмәткәрләр өчен «Электрон балалар бакчасы» автоматлаштырылган мәгълүмат системасында эшләү буенча курслар үткәрде.