Министр әти-әниләрнең фикеренә колак салды

Оптимальләштерү мәсьәләсе Әгерҗе районының Салагыш мәктәбенә инде икенче тапкыр килеп кагылды. 100 еллык тарихы булган белем бирү учреждениесе тугызъеллыка калдырыла, дигән хәбәр авыл халкын борчуга салды.
Якын-тирәдә генә база мәк­тәбе булырдай башка татар мәктәбе юк. Ә иң якынына – 40 чакрым. Чагыштырмача якын дип саналган Азево һәм Красный Бор мәктәпләрендә русча укыту әти-әниләрдә ризасызлык тудыра. Азево авылына барып-кайту өчен укучыларга көн саен 50 чакрым юл үтәргә кирәк. Тугыз ел дәвамында туган телендә белем алган баланы рус мохитенә кертү кешенең хокукларын чикләү була тү­гелме соң? Юлга асфальт тү­шәлмәве дә борчый.
Авыл халкы

Әлеге хатка ачыклык кертү өчен, Әгерҗе районы мәгариф бүлеге башлыгы Вә­силә Сафиуллина белән элем­тәгә кердек. “Салагыш урта мәктәбе сакланып калачак. Алдагы елларда да кыскарту планына кертелми. Күптән түгел оештырылган авыл җы­е­нында әти-әниләр мәктәпне тугызъеллыкка калдыру бе­лән килеш­мәде. Шуннан соң ТР мә­гариф һәм фән министры Энгель Фәт­тахов белән дә сөйлә­шү булды. Ул әти-әни­ләрнең фикере исәпкә алынырга тиешлеген, финанс табылачагын әйтте”, – диде ул.