Укучылар Арктиканы өйрәнәчәкләр
"Арктиковедение" проекты буенча Россия укучылары өчен Россиянең Арктика зонасы географиясенә, тарихына, биологиясенә һәм җәмгыять белеменә багышланган программа эшләнгән. Башлангыч сыйныфлар өчен аерым программа инде әзер. Ә 5-9 сыйныфларда укучы балалар өчен ул федераль дәүләт белем бирү стандарты кысаларында дәреслекләрне тулыландырачак. Бу ничек булачак?
- Мәсәлән, мәктәп укучылары материклар һәм океаннар темасын уза. География дәреслегенә зур булмаган бүлекләр кертеләчәк, анда Төньяк Боз океаны, архипелаглар һәм Арктиканың яр буе полосалары җентекләп тасвирлана, - дип сөйләде "РГ" хәбәрчесенә программаны әзерләүчеләрнең берсе, "Рус Арктикасы" милли паркы директоры Александр Кирилов.
Проектта катнашучылар инде берничә уку әсбабы, шул исәптән "Арктик әлифба" һәм дидактик материаллар әзерләделәр. "Арктиканың балалар атласы"н эшләүдә башлангыч мәктәп өчен эш дәфтәре ясау финишта диярлек. Әлегә уку программасы Архангельск өлкәсенә генә кагыла. Әмма Санкт-Петербург мәктәпләре дә кызыксыну белдерәләр.
- Безнең программаның өстенлеге-теманы яктырту комплекслы булуы, - дип ассызыклады Александр Кирилов. - Без Арктика табигате турында хикәяләр белән генә чикләнмибез, ә үз-үзебезне әзерләү, барлык дүрт фәнне укыту методикасын эшләү белән тулы уку курсы булдырабыз.
Программаның логик дәвамы булып Арктиканың төрле районнарында мәктәп лагерьлары оештыру тора. Әмма бүген мондый сәфәрләр-бик катлаулы һәм кыйммәтле эш. Әлегә ведомство программаларының берсе кысаларында гына укучыларга Төньяк диңгез буенча атом ледоколларында экскурсияләр оештырыла. Монда алган белемнәр алар белән мәңгегә калачак.