Идел буе спорт һәм туризм университеты каршындагы көллияттә бармен һөнәренә укыта башлаячаклар
Зур укыту-лаборатория корпусы, Универсиада авылының торак кампусы һәм иң заманча 8 спорт комплексы - мондый база белән Россиянең һәр вузы мактана алмый. Быелдан Идел буе физкультура, спорт һәм туризм университетында 23 спорт төре буенча тренерлар әзерлиячәкләр.
«Физик культура юнәлеше - ул «Физкультура белеме», «Спорт менеджменты» профильләре. Шулай ук бездә педагогик белем, адаптив физик культура, рекреация һәм спорт-сәламәтләндерү туризмы буенча юнәлешләр гамәлгә ашырыла», - дип билгеләп үтте Идел буе Физик культура, спорт һәм туризм университетының кабул итү комиссиясе җаваплы сәркатибе Данир Исламов.
Ачык ишекләр көне кысаларында гомуми белем бирү мәктәпләренең 10 һәм 11 сыйныф укучылары арасында 10 нчы олимпиадада җиңүчеләрне бүләкләү булды. Быел анда Россиянең алты төбәгеннән килгән балалар катнашты.
«Бу безнең өчен бик мөһим, чөнки мондый чаралар аша без потенциаль абитуриентларны ачыклыйбыз. Без профориентация эшен сыйфатлы башкара алабыз, киләчәктә университетның төсе булачак студентларны сайлый алабыз», - дип билгеләп үтте җиңел атлетика һәм Спортның ишкәк ишү төрләре теориясе һәм методикасы кафедрасы мөдире Сергей Павлов.
Татарстанда кунакчыллык һәм туризм өлкәсендә кадрлар котлыгы проблемасын хәл итү өчен, Идел буе университеты көллият ача, анда 9 һәм 11 сыйныфны тәмамлаучылар беренче тапкыр ике яңа юнәлеш – кунакханә эше һәм официант-бармен буенча һөнәр ала алачак.
«Әлеге программаларның уникальлеге шунда, алар югары белем программалары белән төзелгән, һәм бу 9 һәм 11 сыйныфлар базасында Урта һөнәри белем алган абитуриентларыбызга югары белемдә уку вакытын 1 елга кыскартырга мөмкинлек бирә»,-дип сөйләде халыкара кунакханә менеджменты һәм туризм институты директоры Резедә Һадиуллина.
Урта һөнәри белем бирүнең тагын ике яңа юнәлеше спорт белән бәйле. Шулай булгач, көллиятне тәмамлагач, балалар адаптив физкультура өлкәсендә тренер һәм белгеч һөнәрен ала алалар, ул тагын да актуальләшә бара.