Татарстанда мәктәпләрне төзекләндерү программасы икенче ел дәвам итә

Быел 167 гомуми белем бирү учреждениесе яңартылыр дип көтелә. Дүрт мәктәптән кала башкалары әлеге эшкә керешкән инде. Күптән түгел республика башлыгы Рөстәм Миңнеханов ТР Мәгариф министрлыгына ремонтны иң яхшы итеп башкаручыларны бүләкләү системасын булдырырга тәкъдим итте. Без исә ремонт барышын Азнакай мәктәпләрендә күзәттек.
Азнакай районында узган ел Актүбә, Азнакай, Сухояш мәктәпләрендә ремонт уздырылган булса, быел дүрт гомуми белем бирү учреждениесе үзгәреш кичерәчәк. Болар – Азнакайның 4 нче лицее, 8 нче кадетлар һәм Сарлы, Чалпы мәктәпләре. Төзекләндерү өчен республика бюджетыннан 88 миллион сум акча бүлеп бирелгән. Гомумән, район үзе дә мәктәпләрне ремонтлауга акчасын кызганмый.
– Мәктәпләрне ремонтлау программасын булдыру бик әһәмиятле дип саныйм. Чөнки белем йортларының күбесе 40-50 ел элек үк төзелгән. Әгәр аларны бер кат ремонтлап чыга алсак, бик зур алга китеш булачак, – ди Азнакай районы башкарма комитеты рәисенең социаль мәсьәләләр буенча урынбасары Дамир Гыйләҗев.
Урынбасар белдергәнчә, районда ремонт февраль аенда ук башланган. Әлбәттә, моның өчен башта әти-әниләрдән ризалык сораганнар. Алар каршы килмәгән. Гомумән, яңарту эшләре укуга комачаулык китермәгән. Ремонт исә 1 августка кадәр төгәлләнергә тиеш.
– Безнең лицей 1962 елда ук төзелгән. Бу уку елында 572 укучы белем алды. Моннан биш ел элек аның түбәсе алыштырылган. Белем йорты иске иде. Яныннан узганда эч поша иде. Бигрәк тә коймалар, тәрәзәләрнең иске рамнары күңелсезләп тора иде. Мәктәптә канализация, җылылык системасы, ишек, тәрәзәләр алыштырылачак. Түбә яңартылачак. Бина латонит белән тышланачак. Ишегалдына асфальт җәеләчәк, – ди лицей директоры Ленар Хәйруллин.
1976 елда сафка бастырылган Сарлы мәктәбендә кызу эш өсте. Монда түбә, тәрәзә-ишекләр, канализация алыштырыла, мәктәп эченә санузел ясала, мәктәпнең тышкы ягы матурлана.
“2012 – 2013 уку елында Сарлы мәктәбендә Югары Стәрле, Сөендек, Бүләк авылларыннан 92 бала укыды. Ремонт безгә бик кирәк иде. Яңгыр яуганда түбәдән тамчы тамып җәфалады. Бәдрәф тә тышта урнашкан. Төзекләндерүгә авыл халкы бик сөенде. Һәр куйган тәрәзә, ишек өчен сөенеп бетә алмыйбыз. Мәктәбебез матурлангач, уңышлар артыр дип ышанып калабыз. Бердәм дәүләт имтиханнарында бер генә елны да сынатканыбыз юк”, – ди Сарлы мәктәбе директоры урынбасары Минзилә Мөхәммәдиева.
Яңартканны, матурлыкны кем яратмый инде?! Үзгәрешләр исә коллективка тагын да рухланып эшләргә, укучыларга яхшырак белем алырга этәргеч бирер дип өметләник.