Җәйге сәламәтләндерү кампаниясендә балалар лагерьларында 5 миллион бала ял итәчәк
2022 елда җәйге сәламәтләндерү кампаниясендә, узган ел белән чагыштырганда күбрәк оешма катнаша, төбәкләргә финанслау арттырылган. Бу хакта РФ мәгариф министры урынбасары Денис Грибов «Бердәм Россия» Бөтенроссия сәяси партиясенең «Балаларның җәйге ялын оештыру» темасына узган эшлекле киңәшмәсендә сөйләде.
«Быел 38 меңнән артык оешма җәлеп ителәчәк, бу узган ел белән чагыштырганда 3 процентка күбрәк. 2022 елның җәендә балаларның ялын һәм сәламәтләндерүен оештыруга төбәкләр тарафыннан планлаштырылган финанслауның гомуми күләме 62 млрд. сум тәшкил итәчәк. Бу 2021 елга караганда 13 млрд сумга күбрәк», - диде Денис Грибов.
РФ Мәгариф министры урынбасары хәбәр иткәнчә, балалар лагерьларында быел 5 миллионнан да ким булмаган бала ял итәчәк, аларның 1,5 миллионы – авыр тормыш хәлендә калган балалар. Узган ел җәйге сменаларда лагерьларда 4,3 млн укучы булган.
Лагерьларда быел Россия Федерациясе Дәүләт флагын күтәрү тантанасы уза. Федераль балалар үзәкләрендә тантаналар ике форматта үткәрелә: көндәлек һәм тантаналы формада.
Җәйге сәламәтләндерү кампаниясендә ДНР һәм ЛНР территорияләреннән килгән балаларга аерым игътибар бирелде. Быел Донецк һәм Луганск халык республикаларыннан 790 бала «Артек», «Орленок» һәм «Смена» федераль балалар үзәкләрендә ял итәчәк.
Июнь башында Россия Мәгариф һәм фән министрлыгы белән берлектә гамәлгә ашырыла торган «Университет сменалары» проекты старт алды. Проект кысаларында балалар һәм яшьләр инновацион иҗаты үзәге һәм ЛХР балалары өчен, шул исәптән педагогик югары уку йортлары мәйданчыкларында да, тарихи урыннарга барып, профильле белем бирү сменалары уза.
Шулай ук быел «Арктика Балалары» программасы кысаларында лагерьларда Арктика зонасы төбәкләреннән 6 меңгә якын яшүсмер бушлай ял итәчәк. Программа Россия Мәгариф һәм фән министрлыгы ярдәме белән үткәрелә.
Денис Грибов билгеләп үткәнчә, барлык балалар да, лагерьга бару – бармауга карамастан, җәй көне түгәрәкләрдә һәм спорт секцияләрендә шөгыльләнәчәк, ә өлкән мәктәп укучылары, теләге булганда, тоткарлыксыз эшкә урнаша алачак.
Җәйге ял нәтиҗәләре буенча балаларның куркынычсызлыгын тәэмин итү һәм системалы ярдәм күрсәтү формаларын колачлау, төрлеләндерү буенча биш иң яхшы төбәк билгеләнәчәк.