КФУ магистратурага 256 өстәмә бюджет урыны алды
Казан федераль университеты магистратура программалары, фәнни-технологик үсешнең тиешле юнәлешләре буенча 256 өстәмә бюджет урыны алды, дип хәбәр итә КФУ матбугат хезмәте.
«2022-2023 уку елында университетта 256 магистрант күбрәк белем алачак, аларның 231е көндезге формада һәм 25е читтән торып уку программасын үзләштерәчәк. Быел магистратурада бюджет урыннарының гомуми саны-2 690»,-дип билгеләп үттеләр университетның матбугат хезмәтендә.
Иң күп өстәмә бюджет урыннары (101) - КФУ ның Яр Чаллы институтында. Аларның 27се – «Машина төзелеше» магистрлык программасына һәм 20се - «Җир өсте транспорты техникасы һәм технологияләре» программасына бүлеп бирелгән.
Россия вузларына магистратура программалары буенча 30 мең өстәмә урын бүлеп бирү турындагы боерыкны Хөкүмәт рәисе Михаил Мишустин имзалады.