КФУның Филология институты Россиянең башка төбәкләреннән чыгарылыш сыйныф укучыларын укыту өчен квоталар алды
Казан федераль университетының Филология һәм мәдәниятара коммуникацияләр институтына Россиянең башка төбәкләрендә яшәүче студентларга бюджет белеме бирү өчен квоталар бүлеп бирелде. Бу хакта әлеге институт җитәкчесе Рәдиф Җамалетдинов «Татар-информ»да узган матбугат конференциясендә хәбәр итте.
«Без республика җитәкчелегенә һәм Бөтендөнья татар конгрессына күптән түгел кабул ителгән карарлар өчен рәхмәтлебез. Россия төбәкләре өчен максатчан заказ буенча әзерлекне без күптән алып барабыз, әмма кабул ителгән карарлар Россия төбәкләрендә күп кенә проблемаларны хәл итәргә ярдәм итәчәк», — диде спикер.
Җамалетдинов Россиянең башка төбәкләреннән чыгарылыш сыйныф укучыларын педагогик белем бирү һәм «Реклама һәм җәмәгатьчелек белән элемтә. Копирайтинг һәм бренд-коммуникацияләр» программасы буенча укуга биш юнәлешкә кабул итәчәкләр, дип ачыклык кертте. - Алар бушлай укыячаклар, ә уку тәмамланганнан соң үзләренә әйләнеп кайтачаклар һәм үзләренең һөнәри эшчәнлекләрен тормышка ашырачаклар», — дип билгеләп үтте ул.
Институт җитәкчесе ассызыклаганча, биш педагогик юнәлешкә 25әр бюджет урыны бүлеп бирелгән, ә «Реклама һәм җәмәгатьчелек белән элемтә. Копирайтинг һәм бренд-коммуникацияләр» программасына 15 белгеч әзерләүгә заказ алынган.