Информатика һәм ИКТ буенча БДИ штат режимында узды
Информатика һәм ИКТ буенча БДИ 20 һәм 21 июньдә имтиханның төп чорында катнашучылар өчен штат режимында, җитди өзеклекләрсез һәм тәртип бозуларсыз узды, дип хәбәр итә Мәгариф һәм фән өлкәсендә күзәтчелек буенча Федераль хезмәт.
Икенче ел рәттән әлеге имтихан компьютер формасында үткәрелә.
Информатика буенча БДИда катнашу өчен төп көннәрдә 117,5 меңгә якын кеше теркәлгән. Имтихан барышын җәмәгать күзәтүчеләре һәм мәгариф һәм фән өлкәсендә күзәтчелек федераль хезмәте хезмәткәрләре күзәтте. Башлангыч мәгълүматлар буенча, ике көн дәвамында 19 кеше имтиханның таләпләрен бозу аркасында аудиториядән чыгарылган, аларның нәтиҗәләре юкка чыгарыла, имтиханны яңадан бары тик киләсе елда гына тапшырырга мөмкин.
Информатика һәм ИКТ буенча билгеләнгән минималь бусага 40 баллны тәшкил итә. Имтиханда катнашучыларның барлык җаваплары, экспертлар катнашыннан башка, автомат рәвештә тикшереләчәк.
20 июньдә тапшырылган имтихан нәтиҗәләре 4 июльдән дә соңга калмыйча, 21 июньдә – 6 июльдән дә соңга калмыйча билгеле булачак.
2022 елда БДИның төп чоры 26 майдан 2 июльгә кадәр уза.
Россиядә БДИ бер үк вакытта мәктәптә чыгарылыш имтиханы һәм вузга керү имтиханы булып хезмәт итә. Россия мәктәбен тәмамлау турында аттестат алу өчен рус теле һәм математика буенча БДИ мәҗбүри булып тора.