Көллиятләрдә яңа белгечлекләр буенча укулар киләсе уку елында башланачак
Урта һөнәри белем бирү учреждениеләрендә әзерлек программалары исемлегендә яңа һөнәрләр һәм белгечлекләр барлыкка килде. Шул исәптән «Интеллектуаль интеграцияләнгән системалар», «Азык - төлек сәнәгате биотехнологиясе», «Акваториядә куркынычсызлык», «Кино һәм телепроизводство», «Агромелиорация» һ.б. расланды.
Исемлеккә барлыгы 389 һөнәр һәм белгечлек кертелгән, шуларның 12се – өр-яңа. Алар арасында «Техник ярдәм операторы», «Җәмәгать туклануы продукциясен һәм махсус азык-төлек продуктларын җитештерү буенча аппаратчик-оператор», «Җәмәгать туклануы һәм махсус азык-төлек продуктларын җитештерү технологиясе», «Азык-төлек сәнәгате процессларын һәм технологик җиһазларны эксплуатацияләү, механикалаштыру, автоматлаштыру һәм роботлаштыру», «Һава ташуларын һәм авиация эшләрен оештыру», «Үлчәү приборлары контролеры», «Халыкны эш белән тәэмин итү хезмәте эшчәнлеген тәэмин итү». Моннан тыш, һөнәрләрнең күп өлеше квалификацияне киңәйтү принцибы буенча эреләнгән.
Шул ук вакытта яңа исемлектә базарда ихтыяҗ зур булган һәм абитуриентлар арасында популяр булган монопрофессияләр дә сакланып калган. Киресенчә, базарда ихтыяҗ булмаган белгечлекләр төшереп калдырылган.
2022 елның 1 сентябреннән «Профессионалитет» проектына кергән Белем бирү кластерлары яңа белгечлекләр буенча кабул итә башлаячак.
Моннан тыш, 2023 елдан башлап барлык урта һөнәри белем бирү белгечлекләре буенча диярлек дәүләт йомгаклау аттестациясенең мәҗбүри формасы буларак демонстрацион имтихан үткәреләчәк.
Демонстрацион имтихан кысаларында студентлар реаль производстволарга максималь якын булган шартларда практик бурычларны хәл итәләр, ә бәяләү индустрия экспертлары тарафыннан үткәрелә. Мондый имтихан нәтиҗәләре буенча эш бирүчеләр чыгарылыш сыйныф укучысына алга таба эшкә урнашуны тәкъдим итә алачак.