Мәгариф министрлыгы балалар лагерьлары өчен әйдаманнар әзерләү буенча бердәм система булдырачак
Россия Федерациясе Мәгариф министрлыгы балалар үзәкләре өчен әйдаманнар әзерләүнең бердәм системасын булдырырга планлаштыра, ул әлеге һөнәр вәкилләренең статусын ныгытырга ярдәм итәчәк. Бу хакта ведомство башлыгы Сергей Кравцов «Вожатский трек» телекүпере кысаларында белдерде.
«Вожатский трек» телекүпере министрның Тула өлкәсенә эш сәфәре барышында оештырылды. Анда «Артек», «Орленка», «Океан» сменаларында катнашучылар һәм вожатыйлар, шулай ук министрлык карамагындагы белем бирү учреждениеләре укучылары катнашты.
Чара барышында Сергей Кравцов телекүпердә катнашучыларны, шулай ук аларның барлык хезмәттәшләрен 24 июньдә билгеләп үтелә торган халыкара вожатыйлар көне белән котлады. Ул аларның хезмәтләре һәм балаларга һәрвакыт игътибар бирүләре өчен рәхмәт белдерде һәм «Орленок», «Артек», «Океан» һәм «Смена» федераль балалар үзәкләрендә, шулай ук илебезнең башка балалар лагерьларында вожатыйлар әзерләү буенча зур эш алып барылуын ассызыклады.
Быел җәй балалар лагерьларында барлыгы 80 меңнән артык вожатый эшләячәк, аларның 60 меңе – студентлар.
«Бөтенроссия әйдаманнар мәктәбе» проекты кысаларында күп кенә студентлар вожатый һөнәрен югары уку йортында укыган вакытта ук ала алалар. Әзерлек программаларына шул исәптән педагогик булмаган юнәлештәге укучылар да керергә мөмкин. Моннан тыш, вузларда вожатство инструктивлары үткәрелә. Бу чаралар студентларга конкрет лагерьның атмосферасына чумарга, смена программалары белән танышырга, үзәк хезмәткәрләре белән фикер алышырга мөмкинлек бирә.