1 сентябрьдә Татарстанда милли проект буенча 117 «Үсеш ноктасы» үзәге ачылачак
Татарстанда 1 сентябрьгә «Мәгариф» илкүләм проекты кысаларында авыл мәктәпләре базасында 117 «Үсеш ноктасы» үзәге ачылачак, диде Татарстан Республикасы Мәгариф һәм фән министрлыгының гомуми белем бирү идарәсе башлыгы Татьяна Алексеева.
«"Мәгариф" милли проекты 2019 елдан бирле тормышка ашырыла. Узган чорда 12,5 млрд. сум җәлеп ителгән, аларның 10,5 – федераль өлеш. 437 яңа объект төзелде. Мәсәлән, Чаллыда стационар «Кванториум» базасында мобиль «Кванториум», квалификацияләрне бәяләү үзәге, укытучыларның һөнәри осталыгын өзлексез күтәрү Үзәге, авыл җирлегендә «Үсеш ноктасы» 253 үзәге бар. Республика өчен бу бик мөһим юнәлеш һәм ул тормышка ашырыла», - дип хәбәр итте Алексеева.
Аның сүзләренә караганда, нәкъ менә авыл мәктәпләрендә укыту-лаборатория җиһазларын яңарту таләп ителә. 2018 елда мондый яңарту ОБЖ предметлары, технология белән бәйле иде, шахмат зоналары булдырылды һәм информатика өчен җиһазлар үзгәртелде. Әмма 2020 елдан башлап үзгәрешләр булды һәм мәктәпләр физика, химия, биология буенча заманча җиһазлар белән җиһазлана башлады.
«Республикада тагын 117 «Үсеш нокталары» ачылу мәгариф юнәлешен үзгәртәчәк һәм мәктәпләрдә бу фәннәр буенча белем бирүнең сыйфатын күтәрер дип өметләнәбез», - дип тәмамлады Алексеева.