134 укучы – аттестатсыз

Рособрнадзор бердәм дәүләт имтиханнарында югары балл туплаган укучыларның эшен кабат тикшерергә тәкъдим иткән иде. Быел 100 баллык нәтиҗәләр буенча Брянск өлкәсе, Калмыкия, Чуашия Республикалары рекорд куйды.
Илдә барлыгы 1800 кеше 100 балл туплаган иде. Тикшерүләр әлегә 600 кешенең белеме акланмавын күрсәтә. Иң күп вундеркиндлар Брянскида булганга, эшләрне 10 фән буенча тикшерәләр. Калганнарында – 4-8 фәннән. Брянскида моны, укучыларның күпчелеге төнлә Интернетка урнаштырылган биремнәрне чишеп, күнекмә алган балалар, дип аңлаталар. Биредә бәйләнергә артык урын юк: укучылар сынауда күчермәгән, баллар саны да бергә генә арттырылган. Чуашия Мәгариф министрлыгы, 100 баллны очраклы гына җыючы юк, дип аклана. Узган ел анда математикадан иң югары баллык бер эш тә булмаса да, быел “акыллыбаш”лар саны 46га җиткән. Монда да Интернетка куелган биремнәрнең технологиясен укучылар бер төн эчендә үзләштергән булып чыкты. Калмы-киядә 100 балл туплаучылар узган елга караганда азрак икән. Чыннан да, барысына да контроль үлчәм материалларының Интернетка чыгарылуы сәбәп булып тора икән, ул очракта укучыларга кисәтү ясау мөмкин түгел.
Шул ук вакытта аттестатсыз калучыларның саны да кимегән. Былтыр Россиядә 25 мең егет һәм кыз мәктәптән белешмә алып чыккан булса, быел андыйлар 16 меңнән артык. Татарстанда исә 134 кеше (2012 елда – 233) аттестат алырга лаек түгел дип табылган. Бездә югары баллык эшләр 416 дип исәпләнә. Узган ел аны109 кеше җыйган иде. Республиканың фән комиссияләре рус теле, тарих, информатика, химия, физикадан – 90 һәм аннан югарырак баллы БДИ нәтиҗә¬ләрен кабат тикшерде. Нәтиҗәләр үзен аклады.