Россия Мәгариф һәм фән министрлыгы педагоглар статусын күтәрү өстендә эшне дәвам итә
Укытучылар хезмәтенә мөнәсәбәт үзгәрергә тиеш – бу педагог статусын күтәрү эшендә төп принцип. Бу хакта Россия Федерациясе мәгариф министры Сергей Кравцов Байкал мәгариф форумында чыгыш ясаганда белдерде.
«Инде бик күп мөһим адымнар ясалды: укытучы тутыра торган минималь документлар күләмен билгели торган закон кабул ителде, «Белем бирү хезмәте» төшенчәсе төшереп калдырылды. Системалы чаралар комплексы кирәк, һәм мин педагог һәм остаз елында без бик күп мөһим программаларны гамәлгә ашыра алырбыз дип ышанам. Регионнардагы укытучылар безгә үз тәкъдимнәрен җибәрәләр инде», - дип билгеләп үтте Сергей Кравцов.
Ул шулай ук педагогларга һөнәри ярдәм күрсәтү системасын камилләштерү өстендә эш алып барылуын искәртте һәм укытучыларны бу эшкә кушылырга һәм үз тәкъдимнәрен юлларга чакырды.
Сергей Кравцов шулай ук яшьләрнең педагогик белгечлекләргә карата зур кызыксыну белдерүләре турында хәбәр итте. Бу хакта педагогик вузларга конкурс югары булуы да сөйли – узган ел популярлык дәрәҗәсе буенча бу юнәлеш өченче булды. Быел кабул итү кампаниясенә нәтиҗәләр әлегә ясалмаган, әмма кайбер факультетларга конкурс буенча бер урынга уннан артык кеше туры килә иде.