БДИның “икенче дулкыны” башланды

Бердәм дәүләт имтиханын тапшыруның өстәмә этабы башланды. Төрле сәбәпләр белән төп дулкынга эләгә алмаучылар сынауны 8-18 июль көннәрендә тапшыра ала.
Бүген егет-кызлар рус теле, химия, тарих, информатика һәм мәгълүмати-коммуникацион технологияләр буенча имтихан бирде. 10 июльгә математика, биология һәм чит телләр, 12 июльгә җәмгыять белеме, рус әдәбияты һәм физика буенча сынау билгеләнгән. 12 июль - барлык предметларны тапшыру өчен резерв көн.
Өстәмә дулкында имтиханны башлангыч һәм урта һөнәри белем бирү учреждениеләрендә укучылар, узган елларда мәктәпне тәмамлаучылар, җитди сәбәпләр аркасында май-июнь айларында имтихан бирә алмаучылар, ике мәҗбүри предметның берсеннән (математика яки рус теленннән) минималь баллны туплый алмаучылар тапшырырга хокуклы, дип искә төшерә Рособрнадзор.
Имтиханда катнашучылар үзләре белән кара гельле ручка һәм паспорт алып килергә тиеш. Кәрәзле телефон белән сынауга керү катгый тыела. Кагыйдәләрне бозучыларны БДИдан куачаклар.
БДИны төп дулкында 800 меңгә якын кеше тапшырды, шуларның 754 меңе – мәктәпне быел тәмамлаучылар. Чыгарылыш сыйныфларның 2,24 проценты математика һәм рус теленнән “икеле” алып, аттестатсыз калган.