100 балл туплавыма ышанмаучылар да бар

Ышанмассың да, бер генә түгел, өч фәннән бит ул! Кукмара районының Зур Сәрдек гимназиясен тәмамлаган Адай авылы кызы Гөлназ Садриева быел әнә шундый югары нәтиҗәләр белән шаккатырды. Чаллыдан Максим Мордяшовның да баллары Гөлназныкы кебек үк.
...Мәктәптән кайтып, ашап-¬эчүгә дәресләргә тотынган ул. Төнге сәгать ун¬бер¬¬ләргә кадәр биология, химияне өйрәнгән. Олимпиадаларда да җиңүләр яулаган. Атнага бер мәртәбә химиядән Кукмарага репетиторга йөри. Би¬г¬рәк тә 10-11 нче сыйныфларда Гөлназның көннәре әнә шулай бертөрле үтә. Уку да уку. Әти-әниләре дә аңа башка эш кушмый.
Гөлназ бер ел эчендә генә имтиханга әзерләнеп булмый дигән фикердә. Моның өчен унбер ел дәвамында ныклап укырга кирәк. 10-11 сыйныфта исә алган белемнә¬реңне искә төшерәсең. Шунысын да әйтергә кирәк: Зур Сәрдек гимназиясенә ул рус телендә белем бирүче 3 нче мәктәптән килгән. Шуңа күрә татар мәктәбенә ияләшү җиңел булмаган. Ләкин матур әдә¬бият белән кызыксыну, татар телен камил белергә теләү әлеге киртәләрне җи¬ме¬рергә булыша. “Уңышла-рымда беренче укытучым Рәсүлә Гыйль¬метдинованың өлеше зур. Ул безне кызыксындыра белде. Андагы сыйныфташ¬ларымның яртысы медицина юнәлеше буенча китәргә тели. Аларның да баллары югары. Бик зур рәхмәт аңа”, – ди абитуриент. Шулай ук Зур Сәрдек гим¬назиясендәге биология укытучысы Равия Шә¬фигуллина, рус теленнән белем бирүче Алсу Баһавиева, химия укытучысы Айдар Арслановка да рәхмәтен белдерә.
Гөлназ тугызынчы сыйныфтан соң да сынауларны яхшы тапшырган. Быел сынау имтиханнарында 90лап балл җыйган. Шуңа күрә нәтиҗәләр начар булыр дип шиклән¬мәгән. Әмма өч фәннән дә 100 балл булыр дип ышанмаган. Чөнки биремнәрнең С өле¬шендә, ягъни иншада хаталар китәргә мөмкин. Моннан тыш бланкларны да дөрес тутырырга кирәк. Рус теленнән 100 балл җыюын авыл Сабан туенда белгән ул. Шатлы¬гының иге-чиге булмаган, әти-әнисе дә бик нык сөенгән. Башка БДИ нәти¬җәләренә килгәндә, химия, биологиядән дә баллары – йөзешәр. Ә математика имтиханыннан – 77 балл.
Гөлназ документларының төп нөсхәсен Казан дәүләт медицина университетының дәвалау эше белгечлегенә тапшырган. Анда бүген 110 бюджет урынына мең ярымнан артык гариза кабул ителгән. Моннан тыш КФУ, Ижаудагы медицина университетларына да гаризалар биргән. Баллары шулкадәр югары булса да, укырга керә алырмынмы дип борчыла. 377 балл белән алырлар инде, шәт.