Иң яхшы мөгаллимнәргә - 200 мең сум

Россиянең иң яхшы 1000 укытучысы ачыкланды. Һөнәри бәйрәмнәрендә аларның һәркайсы 200 мең сум акча белән бүләкләнәчәк. Бәхетлеләр рәтендә 27 Татарстан мөгаллиме дә бар.
Соңгы елларда “Укытучы, укытучы” дип сөйли торгач, иң җаваплы һәм игелекле һөнәр ияләренең абруе артты. Мөгаллимнәр бүген зур хөрмәткә ия, хезмәтләре югары бәяләнә торган (шул исәптән матди яктан да) кешеләр рәтендә. Һәм аларга игътибарны киметергә уйламыйлар.
Түрәләребез иң яхшы педагогларны даими билгеләп үтәргә тырыша, ел саен диярлек яңа бәйгеләр үткәрелә, грант программалары да гамәлгә ашырыла. “Мәгариф” илкүләм өстенлекле проекты кысаларында иң яхшы укытучыларны ачыклау һәм бүләкләү – шундый күркәм традицияләрнең берсе. 2006 елны башлангыч алган бу бәйгегә федераль бюджеттан 4,8 миллиард сум акча бүленгән, 44 мең укытучы бүләкләнгән.
Инде әйтеп үткәнчә, быел республикабызның 27 укытучысы иң яхшылар исәбенә кергән, шуларның 16сы - Казан мөгаллимнәре. Татарстан Мәгариф һәм фән министрлыгы хәбәр итүенчә, бәйгенең төбәк этабында 8 меңнән артык кеше катнашкан.
Һәр субъектта җиңүгә лаекларны бәйсез комиссия сайлый. Акчалата бүләкләүгә лаекларны ачыклаганда укучыларның уңышлары, укытучының заманча белем бирү технологияләрен нәтиҗәле куллануы, шәхси методик алымнары булуны, укытучының даими һөнәри үсешкә омтылуын исәпкә алалар.