Белем сыйфатын бәяләү мониторингка карап башкарылачак
Мәгариф сыйфатын бәяләү буенча конференциядә чыгыш ясаганда, мәгариф өлкәсендә күзәтчелек буенча федераль хезмәт җитәкчесе Анзор Музаев Россиядә белем бирү сыйфатын бәяләү, нигездә, Россия мониторингларына юнәлдереләчәген билгеләп үтте.
"Белем бирү сыйфатын бәяләүнең бердәм системасын булдыруда без шактый алга киттек, кирәкле мониторингларның бөтен спектры бездә бар», – дип белдерде Мәгариф һәм фән өлкәсендә күзәтчелек итү буенча Федераль хезмәт башлыгы.
Ул хәбәр иткәнчә, яңа бурычларны исәпкә алып, төбәк мәгариф системаларында идарә механизмнарының нәтиҗәлелеген бәяләү алымнарын төзәтергә кирәк булачак. Үз рейтингларын формалаштырганда Рособрнадзор киләсе елдан төбәкләрне урыннар буенча ранжировкалаудан баш тарта һәм аларны эшнең нәтиҗәлелегенә һәм белем бирү сыйфаты күрсәткечләренә карап өч төркемгә бүләчәк.
Анзор Музаев төп бурычлар арасында шулай ук Россиянең яңа төбәкләрендә мәгариф оешмаларын лицензияләү һәм аккредитацияләү дип атады. Ул билгеләп үткәнчә, монда Кырым һәм Севастополь тәҗрибәсе исәпкә алыначак.
"Даими лицензия алганчы вакытлы лицензия биреләчәк һәм күчү процессы мәгариф системалары өчен стресс-тестлардан башка узарга тиеш", - диде Рособрнадзор җитәкчесе.
Белем бирү сыйфатын бәяләү федераль институты директоры Сергей Станченко 2022 елда Бөтенроссия тикшерү эшләре нәтиҗәләре турында сөйләде. Яз көне ВПР мәктәпләрдә якынча 2,5 миллион укучы арасында өлешчә үткәрелде. ВПРның төп өлеше көз көне узды, аларда 7,3 миллионнан артык укучы катнашты.
Шулай ук быел беренче тапкыр математиканы тирәнтен өйрәнү сыйныфлары өчен аерым ВПР үткәрелде. Анда 260дан артык мәктәп катнашты. Сергей Станченко ассызыклаганча, әлеге проект алга таба үсәчәк, математиканы тирәнтен өйрәнү буенча биремнәр банкын тулыландырачак. Аның сүзләренчә, физиканы тирәнтен өйрәнү сыйныфлары өчен ВПР варианты 2023 елның язына эшләнәчәк.