Студентлар спорты үсешенә грантлар
Россия Мәгариф һәм фән министрлыгы югары уку йортлары арасында физкультура-спорт эшләрен иң яхшы оештыруга грантлар бирү буенча өченче конкурсын башлап җибәрә. 140 млн сум күләмендә субсидияләр федераль бюджеттан бүлеп биреләчәк. Гаризалар 15 февральдә кабул ителә башлый һәм 16 мартка кадәр дәвам итә.
Катнашу өчен финанс дәүләт ярдәме чараларын күрсәтү порталында теркәлергә мөмкин. Конкурсның максаты - студентлар спортын үстерү өлкәсендә югары уку йортларына ярдәм итү.
Грантлар университетларда физкультура, спорт һәм сәламәтләндерү эшләренә юнәлтеләчәк. Шул исәптән студентлар спорт клубларын үстерүгә, спорт инфраструктурасы объектларын ремонтлауга, кирәкле инвентарь сатып алуга һәм спорт чаралары уздыруга.
Җиңүчеләр 30 мартка кадәр игълан ителәчәк. Конкурс сайлап алуы нәтиҗәләре буенча 15 млн сумлык өч грант, 10 млн сумлык биш грант һәм 5 млн сумлык тугыз грант бүленәчәк.
Проект Россия Федерациясе Президенты Владимир Путин йөкләмәсе буенча гамәлгә ашырыла.