Чирмешәннең 6 мәктәбенә I класска быел 1әр генә бала килә, кайбер авылларда анысы да юк

Чирмешән муниципаль районы мәктәпләре яңа уку елына әзер. Моны махсус комиссия тикшереп чыккан. Иске Кади, Югары Кәминкә, Әккәрәй, Түбән Кармалка, Лагерка мәктәпләрен яхшы яктан билгеләргә була. Ивашкино һәм Яңа Элмәле мәктәпләрендә республика программасы буенча капиталь ремонт тәмамланып килә. Югары Кәминкә мәктәбендә дә, нефтьчеләр ярдәме белән, зур ремонт үткәрелгән.
Район мәгариф бүлеге башлыгы Хаммәткамил Хәкимов сөйләгәннәрдән аңлашылганча, Ульяновка мәктәбендә ремонт “Һәркем үтеп йөри алырлык мохит” программасы нигезендә башкарылган. Болардан тыш, быел кайбер мәктәпләрнең җылылык трассаларын ремонтлау каралган. Җылыту сезоны башланганчы, бу эшләр дә төгәлләнергә тиеш, ди җитәкче.
Узган ел районда 207 бала укырга дип беренче тапкыр мәктәп бусагасын атлап кергән (2011дә - 211),ә быел беренче класска 170кә якын гына бала килүе көтелә. Түбән Чегодай, Сосновка, Яшәүче, Югары Чегодай авылларында беренче класска килүчеләр юк. Түбән Кармалка, Әмир, Девичья Поляна, Яңа Элмәле, Иске Котыш, Иске Үтәмеш мәктәпләренә беренче класска 1әр бала килә.
Быел Иске Котыш, Утыз Имән, Кармыш, Шешминка урта мәктәпләре төп мәктәпләр итеп калдырылачак. Сәбәбе һаман шул – аларда укучылар аз.
Башлангыч мәктәпләрдә зур үзгәрешләр булмаячак. Югары Чегодай башлангыч мәктәбе Чирмешән лицееның филиалы була. Түбән Чегодайда бер балага бер укытучы белем бирәчәк, ләкин бу мәктәпне ябарга уйламыйлар.
Мәктәпләрнең ябылуы балаларны авылдан-авылга йөртү кебек яңа мәсьәлә тудыра. Бүген районда 13 мәктәп автобусы бар, тагын 1се кайтырга тиеш. Әмма монда да проблемалар бар. Мәсәлән, Красная Полянадан Иске Котышка 3, Кызыл Чишмәдән Утыз Имәнгә 6 бала йөри. Бу авыллар арасында юллар бик начар хәлдә.
Нигездә, мәктәпләр педагоглар белән тәэмин ителгән. Бүген Түбән Кармалка мәктәбенә химия һәм физкультура, Түбән Кәминкәгә инглиз теле, Чирмешән лицеена математика укытучысы кирәк. Быел районга дүрт яшь укытучы эшкә кайткан