Татарстанда бер ел эчендә 930 ятим баланы торак белән тәэмин итү планлаштырыла
Бу хакта Татарстан Республикасы мәгариф һәм фән министры урынбасары Алсу Әсәдуллина республика август киңәшмәсе секциясендә хәбәр итте.
«Торак белән тәэмин ителергә тиешле гражданнарның саны елдан-ел арта бара. Быелның 1 гыйнварына гына да исемлеккә 14 яшьтән өлкәнрәк 3 840 кеше кертелгән. Агымдагы елга торак белән тәэмин итү хокукы 1 546 кешегә җитте. Ятим балаларны торак урыннары буенча тәэмин итүне киметү өчен 2030 елга кадәр региональ юл картасы расланды ", - диде спикер.
Әсәдуллина ассызыклаганча, бирелә торган торак саны ел саен арта бара. Мәсәлән, узган ел 600 ятим бала фатир алган. Ә 2013 елдан 2022 елга кадәр чорда 4 меңгә якын кеше торак белән тәэмин ителгән.
Моннан тыш, балигъ булмаганнарга беркетелгән торак биналарын саклау мәсьәләсе бар. «Балаларның беркетелгән торакка әйләнеп кайту мөмкинлеге тудырырга кирәк. Барысы 1 117 торак бина саклап калынды», - диде спикер.
Барлыкка килгән торак мәсьәләләре Арча, Әлмәт, Зәй, Кукмара, Түбән Кама, Нурлат һәм Чистай районнарында тиз хәл ителә, дип ачыклык кертте ул.