Kazan Digital Week та Россиядә беренче тапкыр Бөтенроссия студентлар киберкөрәше уза
Россиядә беренче тапкыр бөтен ил яшьләрен берләштергән Бөтенроссия студентлар киберкөрәше уза. Аны уздыру урыны Kazan Digital Week-2023 Халыкара форумы мәйданчыгы.
"Бу ике типтагы команда ярышы - һөҗүмче һәм яклаучылар ярышы. Һөҗүмче студентлар - кайчан да булса мондый ярышларда катнашкан студентлар, ә яклаучылар - узган ел җибәрелгән “Киберкуркынычсызлык буенча югары уку йорты үзәге” проектын тәмамлаучылар, - дип сөйләде “Татар-информ”га Innostage киберкуркынычсызлык академиясе җитәкчесе Нина Шипкова.
Киберкуркынычсызлык вузара үзәге дүрт вуз - КНИТУ-КАИ, Казан дәүләт энергетика университеты, КФУ һәм Иннополис университеты базасында төзелгән.
Киберкөрәштә дүрт "яклаучылар" командасы һәм "һөҗүм итүче" ун команда , һәрберсендә бишәр-алтышар кеше, катнаша. "Һөҗүмчеләр" командасын Мәскәү, Санкт-Петербург, Самара, Пермь, Төмән, Әстерхан, Владивосток, Хабаровск һәм Россиянең башка шәһәрләреннән студентлар тәкъдим итә.
Җиңүчеләр 21 сентябрьдә билгеле булачак һәм алар 100 мең сум күләмендә акчалата бүләк алачак.