Әлмәтнең кызлар командасы - РФС мәктәп футбол лигасының көмеш призеры
Мәскәүдә Россия футбол союзының мәктәп футбол лигасының беренче бөтенроссия ярышлары тәмамланды. Алар "Лужники" спорт комплексы кырларында узды һәм РФ Мәгариф министрлыгы ярдәмендә оештырылды. 1200дән артык катнашучының һәркайсы РФСтан истәлекле медаль һәм бүләкләр алды. Мәктәп футбол лигасын ябу тантанасы 23 сентябрьдә "Лужники" спорт шәһәрчегендә узды. Ярышларда җиңүчеләр һәм призерлар булган 17 регион командаларына кубоклар һәм һәр команданың 96 иң яхшы уенчысына шәхси бүләкләр тапшырылды.
"Лужники"дагы мәктәп футбол лигасы турниры - "Мәктәптә футбол" РФС проектының бер өлеше. Ул балаларны һәм яшүсмерләрне дөньяда иң популяр спортка җәлеп итә. Мәктәп укучыларының физкультура дәресләрендә һәм секцияләрдә футболга якынаю, даими турнирларда һәм фестивальләрдә катнашу мөмкинлеге барлыкка килде. Татарстан Республикасында әлеге проектта 104 гомуми белем бирү оешмасы катнаша.
Әлмәт шәһәренең 16 нчы урта мәктәбенең кызлар командасы РФС Мәктәп футбол лигасының Беренче турнирында көмеш призер булды.