Татарстан мәктәпләрендә пилотсыз очкычлар буенча түгәрәкләр ачачаклар

2024 елның 16 апреле, сишәмбе

Татарстан мәктәпләрендә «Пилотсыз авиация системалары» илкүләм  проекты буенча пилотсыз очу аппаратлары буенча түгәрәкләр барлыкка киләчәк.

«2024 елда республиканың 18 мәктәбе базасында махсуслаштырылган сыйныфлар (түгәрәкләр), ә «Лаеш техник-икътисадый техникумы» базасында практик әзерлек үзәге ачылачак. Ачылу 2024 елның 1 июлендә планлаштырыла», - дип сөйләделәр төбәк ведомствосында.

Россия Мәгариф министрлыгы мәктәпләрдә һәм һөнәри белем бирү оешмаларында пилотсыз авиация системаларын булдыру һәм җиһазландыру буенча төбәкләр арасында конкурс үткәрде. Нәтиҗәләр буенча Татарстан Республикасы җиңүче 30 регион исемлегенә керде.