Караоке белән әдәби кичәләр, хореография һәм кикбоксинг буенча күнегүләр - "Яшьләр" лагеренда Белгород өлкәсеннән килгән балалар вакытны ничек уздыра?
Аларны 2020 елда ремонтланган лагерьның яңа корпусларында урнаштырганнар. Кунаклар өчен аерым бинада 200 урынга исәпләнгән ашханә, мунча-кер юу комплексы, өч җәйге йорт, иҗат йорты, клуб, ике спорт мәйданчыгы, бию зонасы, беседкалар һәм җәйге веранда, шулай ук сәламәтлек буенча мөмкинлекләре чикләнгән кешеләр өчен бүлмә бар. Балалар янына Белгород өлкәсе губернаторы Вячеслав Гладков килде, ул биредәге шартлар белән танышты.
“Яшьләр” лагеренда 5 яшьтән 17 яшькә кадәрге балалар һәм яшүсмерләр яши - өч катлы кирпеч корпуста урнашкан бүлмәләрдә дүртәр-алтышар кеше.
Дәресләр ике сменада уза. Укытучылар Биектау районыннан киләләр һәм ТР Мәгариф һәм фән министрлыгының махсус программасы буенча укыталар. Казан башкарма комитетының балалар һәм яшьләр эшләре комитеты рәисе Алия Заһидуллина хәбәр иткәнчә, балалар барлык канцтоварлар һәм дәреслекләр белән тәэмин ителгән.
Вячеслав Гладков туклану һәм дәвалауның лагерьда ничек оештырылуы, нинди чаралар үткәрүе белән кызыксынды. Территориядә медицина пункты бар. Балалар биш тапкыр ашау белән тәэмин ителгән. Программаларга килгәндә, Белгородтан килгән балалар өчен лагерь территориясендә дә, аннан читтә дә чаралар оештырыла. Мәсәлән, балалар Казан циркында булдылар.
Кич белән вожатыйларда квестлар, уеннар һәм лагерь активистлары белән әзерләнгән театраль куелышлар керә торган программа әзерләнгән. Әдәби очрашуларда балалар шигырьләр укыйлар, фильмнар карыйлар һәм хәтта караоке җырлыйлар. Бик озак көтелгән вакыйга, әлбәттә, көн аралаш оештырыла торган дискотека. Аларда махсус чакырылган диджейлар чыгыш ясый.
Лагерь территориясендә тәүлек буе медиклар һәм сакчылар кизү тора, балалар "Доверие" үзәгеннән психологларның даими күзәтүе астында.