Татарстанда яшәүче ятим балалар «KazanForum»да кулинар мастер-класста катнашты
«KazanForum»ның мәдәни-агарту программасында ел саен уздырыла торган Халыкара яшь пешекчеләр турниры кысаларында балалар йортларында тәрбияләнүчеләр өчен махсус кулинар мастер-класс узды. Инициатива Татарстан Республикасы Хезмәт, халыкны эш белән тәэмин итү һәм социаль яклау министрлыгы ярдәмендә тормышка ашырылды.
Бу юлы чара социаль юнәлештә булды: катнашу өчен Яшел Үзән, Питрәч һәм Саба районнарыннан ятим балалар чакырылды. Проектның максаты – яшүсмерләрне кулинария дөньясы белән таныштыру, җәмәгать туклануы өлкәсе һөнәрләренә кызыксыну уяту һәм иҗади сәләтләрне тормышка ашыру өчен мөмкинлекләр күрсәтү.
Мастер-классның төп остазы Татарстанның танылган аш-су остасы һәм республиканың Пешекчеләре гильдиясе вице-президенты Руслан Асташкин булды. Аның җитәкчелегендә балалар аш-су осталыгы нигезләрен үзләштерде, ингредиентлар белән эшләргә, ризыкларны бизәргә һәм, әлбәттә, тәмле десертлар әзерләргә өйрәнде.
Яшь катнашучылар остаз белән бергә үзенчәлекле сый әзерләде – хуш исле җиләк һәм каймактан әзерләнгән җиңел крем белән коймак.
Мондый чаралар балаларга һөнәри юнәлеш бирүдә генә түгел, аларның шәхси үсешендә дә мөһим роль уйный. Мастер-класста катнашу яшүсмерләр өчен үзләрен яңа эштә сынап карау мөмкинлеге генә түгел, ә тормыш юлын сайлау өчен ярдәм һәм илһам алу мөмкинлеге дә булды.
Алга таба мондый инициативаларны дәвам итү һәм профессиональ бергәлекләр һәм үсеп килүче буын арасындагы элемтәләрне ныгыту планлаштырыла.
«Россия – Ислам дөньясы: KazanForum» халыкара икътисади форумы Татарстан башкаласында 13-18 майда уза. KazanForum Татарстанда 2009 елдан башлап ел саен үткәрелә. Вакыйга 2023 елдан федераль статуска ия. Татарстан Рәисе Рөстәм Миңнеханов Россия Президенты Владимир Путин йөкләмәсе нигезендә «Россия – Ислам дөньясы» стратегик караш төркемен җитәкли.