Урта һөнәри белем бирү оешмаларында кабул итү кампаниясе – 2025: гаризалар саны инде узган елдагыдан 800 меңгә артып киткән
Россия Хөкүмәте Рәисе урынбасары Дмитрий Чернышенко һәм мәгариф министры Сергей Кравцов урта һөнәри белем бирү оешмаларына кабул итү кампаниясенең (СПО) барышы турында сөйләделәр.
Техникум һәм көллиятләргә документлар кабул итү 15 августка кадәр дәвам итәчәк: 21 июльгә 1,7 миллионнан артык гариза бирелгән, бу узган ел белән чагыштырганда 800 меңгә күбрәк.
Россия Федерациясе Хөкүмәте кушуы буенча 2025 елдан федераль көллиятләргә гаризалар бирү «Поступление в вуз онлайн» суперсервисы (алга таба - Суперсервис) ярдәмендә гамәлгә ашырылган. Суперсервиска гомуми урта һөнәри белем бирү программаларын гамәлгә ашыручы 722 федераль югары белем бирү оешмасы тоташтырылган, шул исәптән филиаллар да.
Бюджет урыннарына бирелгән гаризаларның күпчелеге Мәскәү һәм Санкт-Петербургта, Краснодар һәм Пермь крайларында, Төмән, Мәскәү һәм Новосибирск өлкәләрендә, Башкортостан Республикасында күзәтелә.
Татарстан Республикасы Мәгариф һәм фән министрлыгы башлыгы Илсур Һадиуллин билгеләп үткәнчә, элеккечә Татарстан абитуриентлары арасында мәгълүмат системалары һәм программалаштыру, двигательләрне, системаларны һәм автомобильләр агрегатларын техник тәэмин итү һәм ремонтлау, авыл хуҗалыгы техникасын һәм җиһазларын эксплуатацияләү һәм ремонтлау, биналар һәм корылмалар төзү һәм эксплуатацияләү кебек һөнәр һәм белгечлекләр популяр. Кызлар шәфкать туташы, пешекче һәм кондитер эшен, икътисад һәм хисапчы һөнәрләрен сайлый