Татарстан «Һөнәре буенча иң яхшы» конкурсының федераль этабын кабул итәчәк
22-24 сентябрь көннәрендә Татарстан башкаласында «Һөнәре буенча иң яхшы » Бөтенроссия һөнәри осталык конкурсының «Радиоэлектрон аппаратуралар монтажлаучы» номинациясендә федераль этабы узачак. Конкурс Казан радиомеханика көллияте базасында уза. Бу хакта “Татар-информ”дагы матбугат конференциясендә ТР хезмәт, мәшгульлек һәм социаль яклау министры урынбасары Клара Таҗетдинова сөйләде.
Министр урынбасары билгеләп үткәнчә, конкурсның федераль этабында илнең төрле төбәкләреннән 11 белгеч катнашачак. Татарстанга Мәскәүдән, Ульяновск, Новгород, Свердловск, Пенза, Рязань һәм Калуга өлкәләреннән, Чувашия һәм Удмуртиядән конкурсантлар, шулай ук Кырым Республикасыннан белгечләр киләчәк. Татарстанны «Айсиэл Электроникс» ҖЧҖ мастеры Инсаф Сибгатов тәкъдим итәчәк.
Программада - «Хезмәт кешесе» милли премиясен ачу тантанасы, гамәли биремнәр һәм радиоэлектрон сәнәгатьне үстерү турында түгәрәк өстәлләр, мәктәп укучылары өчен мастер-класслар. Йомгаклау 24 сентябрьдә ясалачак.
«Һөнәре буенча иң яхшы» Бөтенроссия һөнәри осталык конкурсы «Кадрлар» илкүләм проекты кысаларында эшче һөнәрләренең абруен күтәрү максатларында үткәрелә.