Татарстан командасы «Имин тәгәрмәч» Бөтенроссия конкурсында көмеш медаль яулады
«Смена» Бөтенроссия балалар үзәгендә «Имин тәгәрмәч» яшь инспекторларының Бөтенроссия конкурсына йомгак ясалды. Ярышны РФ Мәгариф министрлыгы һәм Россия Эчке эшләр министрлыгының Дәүләт автоинспекциясе оештыра.
Илнең 88 төбәгеннән килгән балалар атна дәвамында җиңүче исеме өчен ярыштылар. Татарстан Республикасыннан Адилә Алексеева һәм Альмир Терентьев (Балтач районының Салавыч күппрофильле лицее), Әмир Нәҗмиев (Казанның Киров районының 189 нчы «Заман» күппрофильле гимназиясе) һәм Амаль Садыйкова (Казанның Совет районы С.Х. Заһидуллин исемендәге 159 нчы лицей) составындагы яшь инспекторлар командасы бик яхшы нәтиҗә күрсәтте һәм икенче урын яулады.
Бөтенроссия ярышлары нәтиҗәләре буенча алтын медальне Мәскәү өлкәсе командасы, көмешне - Татарстан Республикасы, бронзаны Свердловск өлкәсе алды.